Буряад дангинануудай амжалта

Эдэ үдэрнүүдтэ Монголдо уласхоорон­дын СОР17 гэһэн хуралдаан эмхидхэгдэ­нэ. ООН-ой байгаали хамгаалгын талаар конвенцидэ 190 гаран гүрэнүүд хабаадана. Тэдэ булта Монголдо өөрынгөө түлөөлэгшэдые эль­гээгээ. Нэн түрүүн газар дайда хосоржо, элһэтэ губи болошохогүйн түлөө гүрэнүүд хамтаран ажал ябуулхаяа хэлсэһэн байгаа. Мүнөө иимэ хуралдаа­нуудта ганса байгаали хамгаалгын бэшэ, мүн ажа­байдалай бүхы шухала асуудалнуудаар хэлсээн бо­лоно. Эмхидхэгшэдэй тэмдэглэһээр, бүхэдэлхэйн бэрхэшээлнүүдые ганса ноёд һайдай, эрдэмтэ­дэй бэшэ, мүн бүхы һалбаринуудай, илангаяа со­ёлой мэргэжэлтэдэй нюдөөр хаража шиидхэгдэхэ ёһотой.

Хуралдаанай үедэ «Нүүдэлшэн» гэһэн бүхэдэлхэйн соёлой фестиваль боложо, Тайж хайрхан хадын хормойдо айлшад суглараа. Эндэ арадай уран урлалай абьяастан, тамиршад, ёһо заншалаа һэргээгшэд суглараа гээд хэлэлтэй.

«World Awards» гэһэн бүжэгшэдэй, гоо һайхан дангинануудай болон дизайнернуудай уласхоо­рондын урилдаан фестивалиин гол хэмжээнүүдэй нэгэн боложо үгөө. Энээниие Монголой Засагай газар дэмжэһэн байха юм.

Буряадай дангина басагад тиишээ ошожо, хэдэн мянган тоото харагшадые, холо ойроһоо сугларһан айлшадые, урилдаанай шүүгшэдые гайхуулаа.

«Краса Бурятии» гэһэн конкурсын хүтэлбэрилэгшэд зорюута уригдаа. Захирал Ру­фина Уюинагай мэдээсэһээр, гол шанда Туяна Да­индарова хүртөө. Туяна хадаа мүнөө жэлдэ «Мисс Улаан-Үдэ» гэһэн үндэр нэрэ зэргэдэ хүртэһэн дангина юм. «Юная краса Бурятии-2023» гэһэн нэрэ зэргэтэй Дарья Бурдуковская тус урилдаан­да «1-дэхи мисс» гэһэн шан абажа шадаа.

Бадма ЯКШЕЕВ бэлдэбэ

Руфина Уюинагай сүлжээнэй хубиин хуудаһанһаа гэрэл зураг