​Буряад-монгол зурхай августын 3-һаа 9 болотор

Августын 3, гарагай 2, буряад-монгол литээр 20.

20-до эд бараа, адуу мал худалдажа абахада, худалдахада, дэгэл хубсаһа эсхэхэдэ, газар хахалхада, таряа ногоо тарихада, адуу малай үһэ нооһыень хайшалхада һайн. Тушаалда дэбжүүлхые, бэриин үйлэ бүтээхые, замда ябахые, гэр байра барихые тэбшэхэ.

«Ниитын» үүдэн нээгдэнэ: суглаа зарлахагүй, шухала уулзалга эмхидхэхэгүй.

Энэ үдэр «морин үхэхэ, эмээл хухарха» ушарһаа харгыда гарахада муу, илангаяа зүүн зүг руу.

Амгалан тайбанай, баялигай, малгайн, гуталай, хубсаһанай хэшэг даллага абахада; гахай, хонин, туулай жэлтэй хүнүүдтэ хии мориёо хиидхэхэдэ, һайн үдэр.

Нохой жэлтэндэ һанаһанаа бүтээхэдэ урагшатай, хонин жэлтэнэй буянай гараг.

Үһэеэ абхуулхада –  үлэсхэлэндэ, ангалгада.

 Августын 4, гарагай 3, буряад-монгол литээр 21.

21-дэ эд бараа, адуу мал худалдан абахада, худалдахада, газар таряанай хэрэгүүдые хэхэдэ, замда ябахада һайн. Тушаалда томилходо, бэриин хэрэгүүдые бүтээхэдэ, дэгэл хубсаһа эсхэхэдэ, адуу малай үһэ нооһо хайшалхада муу.

«Айлшанай» үүдэн нээгдэнэ: айлшадые урихагүй.

Энэ үдэр харгыда гарахада, урда зүг руу муу, бэшэ тээшэ зүглэхэдэ һайн.

Амгалан тайбанай, баялигай хэшэг даллага абахада; хулгана, луу, бишэн жэлтэй хүнүүдтэ хии мориёо хиидхэхэдэ, һайн үдэр.

Морин, могой жэлтэнэй урагшатай үдэр; хулгана, гахай жэлтэнэй буян үйлэдэхэ гараг. Тахяа, бишэн жэлтэндэ муу үдэр - һэргэг ябаха хэрэгтэй.

Үһэеэ абхуулхада – халдабарита үбшэндэ.

 Августын 5, гарагай 4, буряад-монгол литээр 22.

22-то бэшэг номдо, зурхайда, урлаха аргануудта һурахада, газар хахалхада, таряа ногоо тарихада, эд бараа, адуу мал гаргахада, худалдан абахада, худалдахада, үһэ нооһыень хайшалхада, пеэшэн табихада һайн. Тушаалда дэбжүүлхые, замда гарахые, дэгэл хубсаһа эсхэхые, гэр байра барихые, наһа барагшын, бэриин үйлэнүүдые бүтээхые тэбшэхэ.

«Наймаанай» үүдэн нээгдэнэ: олзын хэрэг эрхилхэгүй.

Энэ үдэр харгыда гарахада муу, илангаяа баруун зүг руу.

Үһэеэ абхуулхада – үбшэн хүрэхэ.

Августын 6, гарагай 5, буряад-монгол литээр 23.

23-да гал тахихада, дэгэл хубсаһа эсхэхэдэ, замда гарахада, газар хахалхада, таряа ногоо тарихада, адуу малай үһэ нооһыень хайшалхада, шэнэ гэр бодхооходо, пеэшэн, уһанай хаалта табихада һайн. Тушаалда дэбжүүлхэгүй, адуу мал худалдажа абахагүй, худалдахагүй, аралжаа наймаа ябуулхагүй, худаг, һубаг малтахагүй, нүүхэгүй.

«Хүбүүнэй» үүдэн нээгдэнэ: хүүгэдэй шухала хэрэг бүтээхэгүй, үһыень абахагүй, гэрһээ холо эльгээхэгүй.

Энэ үдэр харгыда гарахада, баруун зүг руу муу, бэшэ тээшэ зүглэхэдэ һайн.

Амгалан тайбанай, хүүгэдэй хэшэг даллага абахада һайн. Тахяа, үхэр, могой жэлтэй хүнүүдтэ хии мориёо хиидхэхэдэ, һайн үдэр.

Бар, туулай жэлтэнэй урагшатай үдэр, харин тахяа, бишэн жэлтэнэй буян үйлэдэхэдэ һайн. Үхэр, луу, хонин, нохой жэлтэн һэргэг ябахые оролдохо.

Үһэеэ абхуулхада – баялигта.

Августын 7, гарагай 6, буряад-монгол литээр 24.

24-дэ замда гарахада, анда нүхэд, багша шаби болоходо, хубсаһа хунар эсхэхэдэ, газар хахалхада, таряа ногоо тарихада, эд бараа, адуу мал худалдан абахада, хүнгэлхэдэ һайн. Тушаалда дэбжүүлхые, адуу малай нооһыень хайшалхые тэбшэхэ.

«Сэрэгэй» үүдэн нээгдэнэ: сэрэг хүдэлгэхэгүй, заргалдахагүй.

Энэ үдэр харгыда гарахада, зүүн зүг руу муу, бэшэ тээшэ зүглэхэдэ һайн.

Амгалан тайбанай, хониной хэшэг даллага абахада һайн.

Хонин, тахяа, бишэн жэлтэнэй урагшатай һайн үдэр; морин, бишэн жэлтэнэй буянай үдэр. Бар, туулай жэлтэнэй чисаа гараг – һэргэг ябаха хэрэгтэй.

Үһэеэ абхуулхада – үбшэн хүрэхэ.

 Августын 8, гарагай 7, буряад-монгол литээр 25.

Хандамаанарай дүйсэн үдэр.

25-да гал тахихада, хубсаһа хунар эсхэхэдэ, шэнэ гэр бодхооходо, газар хахалхада, таряа ногоо тарихада, хуряахада, эд бараа, адуу мал худалдажа абахада, гаргахада, нооһыень хиргахада, аралжаа наймаа хэхэдэ, наһа барагшын хэрэгүүдые бүтээхэдэ һайн.

«Түрэлнүүдэй» үүдэн нээгдэнэ: түрэл гаралнуудтаяа найрлахагүй.

Энэ үдэр харгыда гарахада, зүүн зүг руу муу, бэшэ тээшэ зүглэхэдэ һайн.

Амгалан тайбанай, таряанай хэшэг даллага абахада һайн. Бар, морин, нохой жэлтэй хүнүүдтэ хии мориёо хиидхэхэдэ, һайн үдэр.

Үхэр жэлтэнэй урагшатай гараг; бар, туулай жэлтэнэй буян үйлэдэхэ үдэр. Хулгана, гахай жэлтэндэ урагшагүй үдэр - һэргэг байха.

Үһэеэ абхуулхада – үбшэн хүрэхэ, нюдэн бүрэлзэхэ.

 Августын 9, гарагай 1, буряад-монгол литээр 26.

26-да айраг тараг бүрихэдэ, адуу мал һургахада, нооһыень хайшалхада, газар хахалхада, таряа ногоо тарихада һайн. Тушаалда дэбжүүлхые, замда гарахые, дэгэл хубсаһа эсхэхые, эд бараа, адуу мал худалдан абахые, худалдахые, аралжаа наймаа ябуулхые тэбшэхэ.

«Хэрэмэй» үүдэн нээгдэнэ: гэрэй һуури татахагүй, гэр байра заһабарилхагүй, зөөлгэхэгүй.

Энэ үдэр «морин үхэхэ, эмээл хухарха» ушарһаа харгыда гарахада муу, илангаяа зүүн зүг руу.

Амгалан тайбанай, эдеэ унданай, баялигай, адуу малай хэшэг даллага абахада һайн.

Луу жэлтэнэй урагшатай һайн гараг.

Үһэеэ абхуулхада – жаргалда.

Жаргал лама ДУГДАНОВ бэлдэбэ