Түрэл ороной түүхэ

Энэ ушараар Орос гүрэн дотор һургуулинуудта түүхэ заалгада ехэ анхарал хандуулагдадаг болонхой.

Үшөө 2023 онһоо эхил­жэ, 10-11-дэхи классууд­та түүхын хэшээлнүүд Анатолий Торкунов Вла­димир Мединский хоёрой шэнэ номоор заагдадаг болонхой. Мүн бусад классууд­та номуудые бэлдэлгэ хэдэн бэрхэшээлнүүдтэй дайрал­дана. Илангаяа үнгэрһэн сагай ба хари гүрэнүүдэй түүхэ тухай зүбөөр тааруулан, үхибүүдтэ ойлгуулха түсэб табигдана. Мүн һүүлэй хэдэн жэлдэ боложо байһан сэрэ­гэй тусхай үйлэ хэрэг тухай ургажа ябаа залуу халаанда бүхы талаһаань зүбөөр дам­жуулха тухай Оросой Юрэнхылэгшэ ном бэлдэгшэдтэ даабари үгэнхэй.

Гэхэтэй хамта Оросой регионуудта өөр өөрын түүхын номууд бэлдэгдэжэ, һургуулида заагдадаг боло­хонь. Орос гүрэн дотор 30 можо хизаар түүхын иимэ ном бэлдээ. Түрүүшүүлэй тоодо Буряад Уласай ороһониинь һайшаалтай. Тиимэһээ Бу­ряадай һурагшадта шэнэ хэшээл гарахаяа байһан һуралсалай жэлдэ дурадхаг­даха.

- «Түрэл ороной түүхэ. Бу­ряад Улас» гээд шэнэ ном нэрлэгдээ. Энэ ушараар хэ­дэн жэлдэ ажал үндэр хэм­жээндэ ябуулагдаа. 2025- 2026 онуудай хугасаада баг­шанарые бэлдэхэ һуралсал эмхидхэгдээ, - гээд, БРИОП-ой ахамад багша Аюна Дан­занова хөөрэнэ.

Энэ предмет 5-дахи классһаа үзэгдэжэ эхилхэ, жэ­лэй хугасаада 34 час үгтэнэ. Мүн 7-8-дахи классуудта 18 час үгтэхөөр түсэблэгдэнэ.

Доржи Банзаровай нэрэмжэтэ Буряадай гүрэнэй ехэ һургуулиин таһалгаряагүй һуралсалай дээдэ һургуулиин захи­рал Марина Геннадьевна Цыреновагай мэдүүлһээр, түүхын хэшээлнүүд бусад предмедүүдтэй нягта хол­боотойгоор үзэгдэбэл, һайн байгаа.

- Манай һуралсалай гу­ламта иимэ хэшээлнүүдэй түсэлнүүдые бэлдэнэ. Һаяхана Буряадай мэдээжэ уран зохёолшо Исай Калаш­никовай түрэһэн Шаралдай нютаг ошожо ерээбди. Суута зохёолыень түүхын хэ­шээлдэ дурадхажа, хамта уншажа, түүхэеэ шэнжэлхэ аргатайбди. Ахын аймагаар ябахадаа, «Кропоткиной ябаһан зүргөөр» гэһэн түсэл хээбди. Түүхын эрдэмтэд­тэ Кропоткин анархист гээд мэдээжэ. Харин тэрэ үндэр нэрэ зэргэтэй географ бо­лоно. Тиимэһээ географиин хэшээлтэй нэгэдүүлбэл, һайн байха һэн. Түнхэнөөр яба­хадамнай, түүхын багшанар үсөөн байгаа. Тэндэ физи­кын багшанар жаргаа. Юуб гэхэдэ, Түнхэнэй аймагай дэ­бисхэр дээрэ аяар табан об­серватори бии юм гэжэ олон хүнүүд мэдэнэгүй. «Космос. Физика. Тунка» гэһэн кон­курс багшанарай, үхибүүдэй дунда эмхидхээбди. Иигээд лэ түрэл нютагайнгаа түүхэ шэнжэлхэ, үзэхэ хэрэгтэй гээд һанагдана, - гэжэ Мари­на Цыренова хэлэнэ.