Түрүүшын хонхо жэнгирбэ

Сентябриин 1-дэ эртээнһээ Улаан-Үдэ хотын ЛВРЗ-гэй талмайнууд гоё һайханаар хубсалһан үхибүүдээр, түрэлхидөөр, багшанараар дүүрэбэ. Сиреневый бульварай дэргэдэхи фонтанай хажууда багашуул фото-зурагуудта ороно. «Гурбан баабгай» гэһэн хүгжэмтэ сквер соо хүбүүд, басагад хүхилдэн хөөрэлдэнэ.

Эдэмнай бүгэдэ Дандар Аюшеевэй нэ­рэмжэтэ хүгжэмэй гуманитарна лицейн һурагшад болоно. Удангүй түрүүшын хон­хын һайндэрэй жагсаалда тэдэ зогсобо. Заншалта ёһоороо ахамад классай һурагшад вальс хатар­жа, найр нааданай эхи табиба.

Буряад Уласай Толгойлогшо Алексей Цыденов хүндэтэ айлшан боложо буугаа. Мүн Буряад Ула­сай Арадай Хуралай һунгамал Максим Бувалин амаршалаа.

- Танай урда бүхы харгынууд нээгдэнхэй. Бүхэ, сэсэн, заал һаа элүүр энхэ ургажа ябахадатнай баярламаар. Урагшаа дабшагты, - гэжэ Алексей Цыденов үхибүүдтэ хандаһан байна.

Лицейн захирал Анжелика Павловна Куш­нарёвагай хэлэһээр, тус һуралсалай гуламтада жаргалтай, аза талаантай үхибүүд һурадаг гээшэ.

- Манай лицей юрын гуламта бэшэ. Эндэ һуралсал соёлтой нягта харилсаа холбоотой­гоор урагшаа дабшана. Дунда һуралсалай программаһаа гадна, хүүгэднай 1-дэхи классһаа соёлой талаар хүгжэм, хатар, живопись гэһэн гурбан шэглэлээр һурадаг юм, - гээд, Анжелика Кушнарёва ойлгуулна.

1-дэхи классай түрэлхидэй дундаһаа Юрий Ткачёв, 11-дэхи классай зүгһөө Лариса Смирнова гэгшэд амаршалгын һайхан үгэнүүдые хэлэһэнэй удаа түрүүшын хонхо жэнгирбэ. Багахан Верони­ка Михеева, 11-дэхи классай Антон Черных гэгшэд хонхо үгэжэ, һуралсалай жэлэй шэнэ жэл эхилбэ гэжэ гэршэлбэд.

Лицейдэ тиимэшье олон үхибүүд һурадаггүй. Жэл бүри эндэ 25-26 хүн 1-дэхи класста абтана. Тэдэ тон ехэ конкурс дабажа гарана. Юуб гэхэдэ, бэлигтэй эдир хүүгэдээр Улаан-Үдэ хотомнай ба Буряад Уласнай баян юм.

 

 Баяр ёһололой үедэ бүхы түрэлхидтэ, багшанарта, хүндэтэ айлшадта ахамад классай хүбүүд, басагад хатар бэлэглэбэ. Найр нааданай түгэсхэлдэ 1-дэхи ба 11-дэхи классуудай үхибүүд нэгэдэжэ, һайхан дуу хангюурдаа. Хэзээ тэдэ бэлэдхэл хэжэ үрдеэб гэжэ һанахаар. Нүгөө талаһаань хараад үзэхэдэ, талаан бэлиг ехэтэй үхибүүд иишээ ородог юм гэжэ хэлэһэнэй удаа гайхахаар юумэн үгы.

2021 ондо хүгжэмэй гуманитарна лицейн шэнэ байшан бодхоогдожо, ашаглалгада тушаагдаа һэн. Харин мүнөө жэлдэ хуушан, 1-дэхи бай­шаниинь һэльбэн заһабарилгада ороо гээд хэлэлтэй. Буряадай Арадай Хуралай һунгамал Максим Бувалинай туһа нэмэреэр «Гурбан баабгай» гэһэн сквер хэгдэһэн бай­гаа. Үнгэрһэн жэлдэ тэндэ хүгжэмэй зэмсэгүүдтэ зорюулагдаһан арт- талмай зохёогдоо. Энэ лицейн һурагшадта зорюулагдаа гэхэдэ, алдуу болохогүй.

- Манай лицейдэ үхибүүд үшөө һуража байхадаа, соёлой талаар мэргэжэлнүүдэй урдахи бэлэдхэл хүсэд гараадхина. Дүүргэмсээрээ хүгжэмэй, уран һайханай хатарай мэргэжэлтэ училищинуудта бэлэ­хэнээр орожо, саашадаа шадамар бэрхээр һурана. Мүн консерватори­нуудай дэргэдэхи лицейн классуудта һуралсалаа үргэлжэлүүлнэ. Мүнөө үедэ һуралсалаймнай гуламтада жэшээтэ уран һайханай 15 бүлгэм тоологдоно. Хотын, уласай соёлой урилдаанууд манай һурагшадгүй үнгэрдэггүй. Бүхэроссиин болон уласхоорондын хэмжээнүүдэй кон­курснуудта шабинарнай ходо шал­гарна, - гэжэ омогорхон Анжелика Кушнарёва хөөрэнэ.

Һуралсалай шэнэ жэлдэ юһэн залуу багша хүдэлхэеэ ерээ гэжэ захирал үшөө нэгэ баяртай мэдээсэл дуулгана. Эдэмнай эхин классуудай, түүхын, буряад хэлэнэй багшанар болоно.