Бэлигтэй багшаяа дурсаа

Эндэхи нютагай арад зон хүндэтэ һоригшоёо дурсан, регион хоорондын мүрысөө эмхидхэнэ. Гэхэтэй хамта, Хужар һууринайхид стелэ бэлдэнэ, Алдар солын хүшөө шэнээр бүтээхээр хараална.

Бэлигтэй бэрхэ багша Доржо Габаевич Дондоков һайн бэ­лэдхэлтэй олон тоото тамиршадые бэлдэһэн байна. Илангаяа бүхы гэр бүлөөрөө шатар, даам наадажа, аймагайнгаа, уласайнгаа мүрысөөнүүдтэ шалгардаг һэн. Жэ­шээлбэл, хүдөөгэй тамирай наада­нуудта Доржо Габаевич гурбан баса­гадаараа эрхимээр наададаг байһан юм.

Эрхим наадагшадай тоодо зээ басаганиинь Санжидма Халхаева МАРШ гэһэн эмхиин үүсхэһэн мүрысөөндэ дэлхэйн абарга болоо бэлэй. Хужар нютагай Чингис Убушеев, Зорикто Шаргакша­нов гэгшэд Европын хэмжээнэй мүрысөөнүүдтэ шалгараа. Нүгөө зээ басаган Дулмань Сибирь болон Алас Дурна зүгэй мүрысөөндэ нэгэ­тэ бэшэ шалгарһан намтартай.

Һаяхана Хужарай һургуулиин танхим соо Доржо Дондоковой мүнхэ дурасхаалай ээлжээтэ регион хоорондын мүрысөөн эмхидхэгдээ. Эрхүүгэй можоһоо даамшад олоор ерэһэн байна. Мүн Буряадай мэдээ­жэ наадагша Александр Халтагаров энэ мүрысөөндэ хабаадажа, түрүү һуури эзэлээ.

- Түнхэнэй аймагай Ниловкын аршаан дээрэ гоёор амаржа бай- гааб. Иимэ мүрысөөн үнгэрхэнь гэжэ дуулаһаар, Хужар нютаг хүрэжэ ерээб, тиимэшье холо бэшэ. Һайнаар эмхидхэгдээ гэхэдэ, алдуу болохогүй, - гээд, эрэмдэг бэетэйшүүлэй дунда таба дахин дэлхэйн абарга Алек­сандр Халтагаров хөөрэнэ.

Доржо Габаевичай ашаар даам наадалга Түнхэндэ һайнаар хүгжэһэн юм. Наһа бараһанайнь удаа хэдэн олон жэл болобошье, даам наадаха дуратайшуул үсөөрнэгүй, алдар солонь нютаг нугануудаараа зэдэл­нэ. Тиигэжэ эхэнэрнүүдэй дунда Дулма Очирова зээ басаганиинь түрүү һуурида гараа. Хэрэн һууринай Сэсэг Холонгуева, Хужарай Саяна Шагдурова гэгшэд шангай һуури эзэлээ.

2009-2011 онуудай басагадай дунда ганса Түнхэнэй аймагай түлөөлэгшэд түрүүшүүлэй тоодо ороо. Хэрэнэй дунда һургуулиин шаби, Хужар нютагта ажаһуудаг Александра Дарбалаева түрүүлһэн байна. Шэмхын һургуулиин шаби­нар, аха дүү Аяна, Милена Сыбыко­ванууд мүнгэн, хүрэл медальнуудаар шагнагдаа. Эрхимлэһэн Алексан­драй дүү басаган Софья бага наһанай бүлэгтэ 2-дохи һуурида гараа. Жэмһэг һууринай Аяна Дымшеева эгээл эдир наһатайшуулай дунда шангай 3-дахи һуури эзэлһэн байна. Бүхы бусад һууринуудые Эрхүүгэй можоһоо ерэһэн тамиршад эзэлээ. Эдэмнай Усть-Ордын Буряадай тойрогой, Ангарск, Эрхүү хотонуудай түлөөлэгшэд болоно.

Түнхэнэй аймагай захиргаанай мэргэжэлтэд, Хужарай сомон дарга Арюна Туруева, Доржо Габаевичай басагад Дарима Танхаева, Янжима Шаргакшанова гэгшэд гол шангуу­дые эрхим наадагшадта барюулаа.

Хужарай һургуулиин гэрэл зураг