Оюутадай ажалай халаан

Буряадай дэбисхэртэ оюутадай ажалай түрүүшын отрядууд аяар холын 1967 ондо байгуу­лагдаа бэлэй. Тэрэ гэһээр хэдэн зуун мянган оюутад зунай үедэ ажаллажа, гүрэнэйнгөө хүгжэлтэдэ горитой ехэ хубита оруулһан байна.

“Сарма” гэһэн уласай отряд мүнөөшье болотор үүргэеэ алданагүй. Һүүлэй байдалаар тэдэ до­лоон шэглэлээр хүдэлнэ. Вожа­тануудай, барилгын, түмэр харгы заһабарилгын, загаһа барилгын ажалнуудта оюутад олоороо ажал ябуулна. Мүн хүдөө ажахын, элүүрые хамгаалгын һалбаринуудта тэдэ ха­баадуулагдана.

Түмэр харгын түбэреэн соо...

“Экспресс” гэһэн отряд түмэр харгы дээрэ поездын проводнигуу­дай уялгануудые дүүргэнэ. Буряадай ехэнхи оюутад Санкт-Петербургһаа Москва хүрэтэр ябана. Теэд эндээ­шье үлэһэн хүнүүд бии. Жэшээлбэл, ерээдүйн юрист мэргэжэлтэй Та­тьяна Викулова һаял энэ ажалда га­ранхай. Улаан-Үдэ-Северобайкальск гэһэн замаар оройдоол нэгэ рейс хээд байна.

- Дээдэ һургуулида оюутанай үнэмшэлгэ һаял абаад байхадамнай, оюутадай ажалай отрядуудта орогты гэжэ маанадые уриһан байна. Ошохо гү, үгы гү гэжэ яһала үни бодооб. Тии­гэжэ түрүүшын суглаанда бэшүүлээб. Нэгэ һара соо медкомисси гара­жа, бэеэ үзүүлээбди. Удаань гурбан һарын туршада бидэнэрые һургаа. Хэды тиигэбэшье түрүүшынгээ рейс­дэ ядаад абааб. Ехэ хүндэ ажал байна. Байн-байн һурахаб гээд һанагдана, - гэжэ Татьяна поезддо һуужа байһан хүнүүдэй билет шалгахынгаа дундуур хөөрэнэ.

Татьяна Викулова

Хүүгэдтэй харилсана

Дари Мадаганова “Лидер” гэһэн вожатануудай отрядые хүтэлбэрилнэ. Энээнһээ гадна “Сердце Бурятии”, “Созвездие”, “На волне” гэһэн от­рядуудай гэшүүд вожатаар зунай хаһада хүдэлнэ.

- “Лидер” гэһэн отрядта 30 гаран гэшүүд тоологдоно. Зунай хаһада бидэ тамирай болон элүүржүүлгын лагерьнуудта үхибүүдтэй хүдэлнэбди. Мүнөө жэл булта вожатаар ажаллаабди. Харин би өөрөө “Юнтур” лагерьта хоёр халаанда хүтэлбэрилэгшөөр хүдэлөөб, - гэжэ Дари Мадаганова мэдүүлнэ.

Дари Мадаганова

Вожатанууд болохын түлөө ехэ бэлэдхэл хэрэгтэй. Нэн түрүүн БГУ- гай гү, али багшанарай колледжын оюутад хабаадуулагдана. Тэдэ уласай бэлэдхэлгын һургуулида хабаадана. Эндэ бэеэ туршажа, вожата боложо шадахабди гэжэ һанаһан залуушуул мэдүүлгэ оруулжа, гурбан һарын бэ­лэдхэл гарана.

Хүдөөгөө үргэлсэнэ

Буряадай гүрэнэй хүдөө ажахын академидэ оюутадые шэлэһэн мэргэжэлээрнь дүршэлтэй, дадалтай болгохо гэжэ оролдоно. Факультет бүхэндэ оюутадай ажалай отрядууд байгуулагданхай.

- Үнэн дээрээ хүн бүхэн өөрын дураар зунай үедэ ажал олоно. Ака­демиин оюутад Камчатка ошонхой, загаһанай үйлэдбэридэ хүдэлнэ. Хэ­дэн хүнүүд проводнигууд болонхой. Вожатануудшье бии. Ехэнхи оюу­таднай өөрын мэргэжэлээр хүдэлнэ. Юуб гэхэдэ, оюутадай ажалай отряд­та хүдэлһэн хаһань практика гээд тоологдоно ха юм. Теэд эдэ хуу ба­рандаа түрүүшын бэлэдхэл түрэл академидээ гарана гээшэ. Хандаһан бүхы хүнүүдые абаха гэжэ оролдо­нобди. Ерээдүйнгээ мэргэжэлдэ нэн түрүүн тэдэ дадана, һурана. Иигэжэ яһала мүнгэ салин зунай үедэ оюу­таднай олоно, - гэжэ БГСХА-гай шта­бай координатор Дмитрий Дамбаев ойлгуулна.

Хүдөө ажахын академи “Агроном Сад” болон “Молочный стандарт” гэһэн бүхэроссиин оюутадай отря­дуудтай нягта харилсаа холбоо та­танхай. Липецкэ болон Воронежой можонуудта оршодог ажахынуудта БГСХА-гай шабинар ошожо хүдэлнэ. Мүн “ЭкоНива” гэһэн агрохолдинг­той хэлсээнэй ёһоор, Новосибир­скын можо оюутад ошоно.

Агрономическа факультедэй дэр­гэдэ “Озеленители”, “Лесная охра­на”, “Садовод” гэһэн гурбан отряд тоологдоно. Нюдэ хужарлуулма гоё гэгшын сэсэгүүд, ногоон ургамал- нуудаар шэмэглэгдэһэн академиин урдахи талмайе “Озеленители” от­ряд жэл бүри бэлдэнэ.

Технологическа факультедэй “Бо­нитёр”, ветеринарна факультедэй “Доктор VIVA” гэһэн отрядууд хүдөө ажахын фермерскэ ажахынуудта туһа хүргэнэ.

Агротехническэ колледжын дэргэдэ “Максимум” гэһэн отрядай байгуулгада Полина Очирова хабаадаһан оюутан юм.

- Колледжын 1-дэхи курсда яба­хадамнай, оюутадай отрядта орогты гэжэ дурадхаа һэн. Тиихэдэ “Озеле­нители” гэһэн отрядта хүдэлөөбди. Удаань “Максимум” отряд хүбүүд, ба­сагадаараа байгуулаа һэмди. “Колос” гэһэн аяншалгын баазада, Мухар- Шэбэрэй аймагай “Нива” СПК-да бо­лон бусад газарнуудаар оюутаднай ажал хэдэг байна. Хажуугаарнь һайн дуратанай тоодо оролсожо, ямар­шье хүндэ ажал бүтээхэ аргатайбди, - гэжэ БГСХА-гай 4-дэхи курсын оюу­тан Полина Очирова хөөрэнэ.

Иимэ оюутадай ажалай отрядта ябаһан хүбүүд, басагад ерээдүйдэ шадалтай боложо, шэлэһэн мэргэ­жэлээ олониинь орхиногүй. Тэдэнэр түрэл нютагаа үргэн хүгжөөнэ.

Борис Балдановай болон БГСХА-гай гэрэл зурагууд