Амтатай ба сог залитай талын наадан

Баяр ёһололто хэмжээн һүр жабхалантайгаар нээгдэжэ, саашанхи үргэлжэлдэнь бу-ряад заншалта ёһоор һур хар­балга, шагай наадан, баргай наадан, үндэһэн заншалта хубсаһатай бүлэнүүдэй хоорондохи мүрысөөн үнгэргэгдэһэн байна.

Амтатай эдеэнэй, сог залитай тамирай, уран урлалай үзэсхэлэнгүүдэй, хүхюутэй мүрысөөнүүдэй, дуу хатарай найр наадан бүгэдын хабаатай гранд – ёохороор түгэсөө юм.

Шулуунууд дээрэ хониной мяха – хорхог болгохо гол мүрысөөндэ Дулдаргын, Могойтын, Агын аймагуудай, Ага тосхоной ба Хитадай Үбэр Мон­голой хамта табан команда хоорон­доо мүрысэһэн ушартай.

Чингис хаанай эгээл дуратай эдеэн байһан үльгэр домогто хорхо­гые Ага тосхоной Содном ба Туяна Рабдановтанай бүлэ эгээл амтатай­гаар ба бушуу түргэн бэлэдхэжэ бол­гоод, Гран-при шүүһэн аза талаантай! Илагша бүлэ туһалагшадтаяа - Сергей ба Гылыгма Сырцевтэнэй бүлэтэй хамта 43 минутын 5 секун­дын туршада бүхэли хониной мяхые үе мүсэнүүдээр задалжа эмдээд, буйлуулжа болгоод, 23 мяхан табаг бэлдэжэ, жюриин гэшүүдтэ ба хараг­шадта дурадхаһан байна.

Содном ба Туяна Рабдановтанай бүлэдэ илалтын баярай Гран-при – 50 мянган түхэриг барюулагдаа.

Хамтын дүнгөөр, түрүүшын һуури Дулдаргын аймагай команда эзэлжэ, 40 мянган түхэригэй шанда хүртэбэ. Хоёрдохи һуури – Могойтын аймаг 30 мянган түхэриг шантай, гурбада­хи һуури – Үбэр Монголой Шэнэхээн нютагай команда эзэлжэ, 20 мянган түхэригөөр урмашуулагдаа.

Тэрээнһээ гадуур амяараа номи­нацинуута илаһан хабаадагша бүхэн 10 мянган түхэригөөр шагнагдаһан байна.

Тэдхэмжэ туһаламжын наадалгын гол шан – “Тойота-Камри” гэһэн авто-унаа Догой нютагай ажаһуугша пен­сионертэ барюулагдаа.

Гастрофестивалиин гол шан - "Тойота-Камри"

Бүгэдэ байһан зон тэрэ наһажаал хүнэй ехэ шанда хүртэһэндэ, үнэн зүрхэнһөө урмашан, баярыень хубаалдаа гэжэ тэмдэглэгдэнэ. Гол шан шүүгшэ 70 наһатай, эндэ һая хүбүүгээ алдаад, үншэрһэн табан үхибүүдтэнь туһалхын тулада хуушан авто-унаагаа такси болгожо, зониие шэрэдэг ажалтай ха.

«Хорхогой» нааданда ерэһэн эгээл балшар бага хабаадагша 2 наһатай, харин эгээл үндэр наһатайнь 97-той байгаа. Тэрэ хүндэтэ аха захатан - Самбу Доржиевич Базаров, Агууехэ Эсэгын дайнай хабаадагша иигэжэ хэлэнэ:

- Эндэ боложо байһан найр наадые зорюута харахаяа ерээб даа. Анда нүхэд сугларжа, бэе бэеэ хүндэлнэ.

Энэ заншалта болоһон гастро-фестивальда сугларагшад сэнгэн амархын хажуугаар буряад арадайн­гаа ёһо заншалнуудтай, түүхэ соёл­той гүнзэгы дүтөөр танилсажа, удха шанарыень һайнаар ойлгодог ба сэгнэдэг болоно гэжэ эли.

- Хоёр жэлэй туршада бидэ 3 сая түхэригэй федеральна субси­ди абаһанай ашаар тус фестиваль үнгэргэнэбди, - гэжэ “Хорхогой наадан” гастрофестивалиие эрхилэн эмхидхэгшэ Бато Цыренжапов тэм­дэглээ.