Баатар сэрэгшэдээ дэмжэн үргэе

Бүхы аймагуудһаа бууһан хүндэтэ сэрэгшэд гүрэн түрын засаг баригшадтай нягта харилсаа холбоотойгоор сэхэ харилсажа, һонирхоһон асуудалнуудаа табиба.

Улаан-Үдэ хотын ФСК-гай эгээл ехэ талмай дээрэ хоёр мянга гаран хүн хабаадаһан байна. Бүхы сугларагшадта, илангаяа сэрэгэй тусхай үйлэ хэрэгтэ хабаадаһан сэрэгшэдтэ Буряад Уласай Толгойлогшо Алексей Цыденов, Арадай Хуралай Түрүүлэгшэ Владимир Павлов баяраа мэдүүлбэ.

- Та бүгэдэниие Эсэгэ ороноо хамгаалагшын үдэрөөр амаршалнаб. Мүн тиихэдэ Сагаан һараар, Масленицын һайндэрнүүдээр амаршалха байнаб. Теэд эгээл ехэ баяртай һайн үдэрнай удангүй болохо гээд найдагдана. Сэрэгэй тусхай үйлэ хэрэгүүдтэ бүхы табигдаһан зорилгонууд хүсэд шиидхэгдэжэ, сэрэгшэ хүбүүднай илалтатай гэртээ бусахал даа, - гээд, Алексей Цыденов амаршалгын үгэнүүд соогоо тэмдэглээ.

Буряадай Толгойлогшын хэлэһээр, сэрэгэй тусхай үйлэ хэрэгүүдтэ баатаршалга гарган хабаадалсаһан, бэеэ хайрлангүй буу барижа, нютаг оронойнгоо түлөө бодожо шархатаһан хүбүүдтэ, тэдэнэй гэр бүлэдэ бүхы талаһаань туһаламжа үзүүлхэ гэһэн зорилго мүнөө үедэ гүрэн дотор засаг баригшадай, ниитын урда табигдана. Тиимэһээ энэ үдэр ажабайдалай бүхы һалбариин талаар эмхи зургаанууд, һуралсалай гуламтанууд тус форумдо хабаадалсаа.

Хуралдаанай үедэ Буряадай Засагай газарай яамануудай хүтэлбэрилэгшэд тайзан дээрэһээ тэрэ энэ һалбариин талаар ямар тэдхэмжэнүүд сэрэгшэдтэ үзүүлэгдэнэб гэжэ сугларагшадта хөөрэжэ үгөө.

- Бидэ, ноёд һайд, бүхы юумэ мэдэнэгүйбди, ойлгоногүйбди. Юун хэрэгтэйб, ямар бэрхэшээлнүүдтэй дайралданабта гэжэ эшэжэ, гайхажа байнгүй, айнгүй хүсэд хэлэжэ үгөө һаатнай, ехэ һайн. Мүн таанадай элдэб янзын дурадхалнуудыетнай хүлеэнэбди. Хамтаараа тэдэниие шиидхэжэ, ерээдүйнгөө ажабайдал һайжаруулхабди, - гэжэ форумой нээлгын үедэ Алексей Цыденов сэрэгшэдтэ хандаа.

Хүн зониие ажалаар хангалгын агентство ехэхэн ажал ябуулһан байна. Сэрэгшэн ямар шарха абааб, ямар үбшэнһөө хэдыдэхи бүлэгэй инвалид болооб гэжэ хараадаа абан, тусхай мэргэжэлнүүдэй бүридхэл хэһэн байна. Тэрээн тухай сэрэгшэ бүхэндэ хүргэн мэдээсэхэ гэжэ оролдоно.

Мүн энэл агентство 110 мэргэжэлдэ шэнээр һурахыень СВО-гой ветерануудта энэ үдэр дурадхаа. Нэгэшье мүнгэ алта түлэнгүй, тэдэ шэнэ мэргэжэлтэй болохо аргатай.

Юридическэ талаар туһаламжа үзүүлхэ хэрэгтэ баһа яһала ажал хэгдэнэ гэжэ хэлэлтэй. Форумой үедэ сэрэгшэд иимэ нэмэлтэ туһаламжада хүртөө.

Энэ хэмжээ ябуулгада хабаадаһан 20 гаран эмхи зургаан, ажахы, үйлэдбэри СВО-до хабаадагшадые ажалда абаха тухайгаа мэдүүлээ. Мүн дээдэ болон дунда мэргэжэлэй һуралсалай гуламтанууд эндэ хабаадажа, сэрэгшэдые һургахаяа бэлэн байһанаа дуулгаа.

- Суг хамта ээм ээмээ түшэлсэжэ, суг хамта дайлалдаһан сэрэгшэ нүхэдөөрөө мүнөөдэр эндэ уулзашооб. Сугтаа хөөрэлдэһэнэй удаа гүрэнэй талаһаа ямар туһаламжа тэдхэмжэдэ хүртэхэ аргатайбибди гэжэ хүсэд мэдэнгүй ябанабди гэжэ мэдэрээб. Тиимэһээ иимэ хуралдаан ехэ удха шанартай, туһатай хэмжээ ябуулга гээшэ. Олон сэрэгшэд ажал бэдэрнэ, нүгөө зариманиинь һургуулитай болохоёо һанана. Сүлөө сагаа яажа үнгэргэхэб гэжэ һонирхоһон сэрэгшэдшье бии. Эдэ бүгэдые нэгэ талмай дээрэ оложо, хүн бүхэн хэрэгтэй, дуратай ажал хэрэгээ олохо аргатай байна, - гэжэ Орос гүрэнэй Герой Дашибал Цырендоржиевич Мункожаргалов мэдүүлнэ.

Форумой үедэ уласай тамирай адаптивна һургуули өөһэдынгөө талмай зохёон, сугларагшадта дурадхаа. СВО-һоо бусажа, тамирай талаар бэеэ олоһон хүнүүд яһала олон болонхой. Адаптивна һургуулиин ашаар тэдэ һуумал волейбол наадана, коляскатай баскетболдо һурана. Мүн сноубордоор, һур харбалгаар, сагаалса буудалгаар бэеэ һорино. Энэ үдэр ветерануудые хутага шэдэжэ, дартс нааданда тэрэ дороо һургалга боложо байгаа.

Шэн зоригой орденоор шагнагдаһан Бабасан Дымбрылов нэгэ жэлэй хугасаада һур харбалгаар бэеэ һорино. Энэ богони болзор соо тэрэ спортын мастерай кандидат болотороо дүнгөө һайжаруулжа шадаа.

- Урид һур харбалгаар нэгэшье бэеэ һоридоггүй байгааб. Харин хүндөөр шархатаһанай удаа гэртээ ерээд байхадамни, манай Харгана нютагай һур харбалгын һоригшо Владимир Пурбуевич Банзаракцаев: “Һорилго хэжэ эхилхэ хэрэгтэй”, - гэжэ хэлээ һэн. Зорикто Валерьевич Будаевтай намайе танилсуулаа. Түрүүшээр тиимэ ехэ хүндэ байгаагүй. Юуб гэхэдэ, хэды шархатаашье һаа, ажабайдалаа шэнээр зохёожо, өөрөө хүгжэжэ, һанаа бодолоо табибал, ямаршье бэрхэшээл шамайе дайрахагүй. Сэрэгшэд хүбүүдтэ иигэжэ хэлэдэгби, - гэжэ Бабасан Дымбрылов хэлэнэ.

Баяр ёһололой оршон байдалда «Сэрэгэй тусхай операцида хабаадаһанай түлөө. Баяр хүргэгшэ Буряад орон» гэһэн дурасхаалай медаль бүлэг сэрэгшэдтэ барюулагдаба. СВО-до хабаадажа байһан сэрэгшэдтэ үдэр һүнигүй туһалжа байһан һайн дуратан мүн лэ шангуудта хүртэбэ.