АЛДАР СОЛЫЕНЬ ДУУДАЯ!

Мүнөө жэлэй мүрысөөнэй дүримдэ оруулагдаһан эгээ шухала хубилалтанууд тухай абаһаар лэ дуулгая. «Буряадай түрүү хүнүүд» гэһэн конкурсдо хабаадаха хүнүүд ажаһуудаг нютагайнгаа (тосхонойнгоо, хотынгоо, аймагайнгаа) захиргаанһаа гү, али ажалладаг (ажаллаһан) албан зургаанһаа, мүн олониитын эмхиһээшье мэдүүлгэнүүдые бүридхэхэ ёһотой. Мэдүүлгын хэб burunen.ru сайт дээрэ орожо, «проекты» гэһэн тобшо даража, «Лучшие люди Бурятии» гэһэн буланда ороод татажа абахада болоно. Гадна редакцитай холбоо барижа, 1000 түхэригэй эмхидхэлэй түлбэри оруулха хэрэгтэй.

Үшөө тиихэдэ байгша оной мүрысөөндэ нэгэ шэнэ номинаци оруулагдаба. Эмхидхэлэй хороондо ороһон олон тоото дурадхалнуудай үндэһөөр хүдөө нютагта амидаржа, үндэһэн ажахыгаа эрхилһэнэй ашаар нютаг оронойнгоо байдал үргэжэ байһан хүнүүдые алдаршуулха зорилготой «Абарга малшан» гэһэн нэрэ зэргэ эмхидхэн байгуулагдаба гээшэ.

Юумэн гээшэ байра дээрээ байжа байдаггүй, хубилдаг жаматай ха юм даа. Тиимэһээ манай конкурсдошье баһал саг үеын эрилтээр, арад зоной хүсэлөөр һэлгэлтэнүүдэй оруулагдахань зүй ёһоной хэрэг гэжэ бодогдоно. Алибаа асуудалаар unen@govrb.ru гэһэн хаягаар бэшэг бэшэжэ гү, али Улаан-Үдэ хото, Каландаришвилиин гудамжа, 23 хаягаар 52-дохи кабинедтэ ерэжэ, харюу абажа болоно.

«БУРЯАДАЙ ТҮРҮҮ ХҮНҮҮД - 2026» ГЭҺЭН КОНКУРСЫН ДҮРИМ

1. Юрэнхы мэдээсэл
2. Эмхидхэгшэд: «Буряад үнэн» Хэблэлэй байшан, Бүгэдэ Буряадай үндэһэн соёлой эблэл.
3. Конкурсын зорилгонууд:

а) Буряад Уласай ба Оросой Холбоото Уласай бусад можо нютагуудай, хари гүрэнэйшье ниигэмэй-эдэй засагай, соёлой ба оюун ухаанай хүгжэлтэдэ горитой хубита оруулжа, үргэн олониитын хүндэ ямбада хүртэһэн эрхим түрүү хүнүүдые элирүүлэн алдаршуулха;

б) Эхэ орондоо дуратай, гэр бүлэдөө үнэншэ хүнүүдэй жэшээ харуулха;

в) Уншагшадай зохёохы эрмэлзэл дэмжэхэ;

г) Буряад хэлэ хүгжөөн дэлгэрүүлхэ.

1. Эмхидхэлэй хороондо дурадхагдажа, сониндо толилогдоһон зураглалнуудай геройнууд конкурсын хабаадагшад болоно.
2. Баримталха зүйлнүүд
3. Конкурс үнгэргэхын тула эмхидхэлэй хорооной түлөөлэгшэдэй зүгһөө бэеэ дааһан жюри бүридхэгдэнэ.
4. Конкурс удаадахи шэглэлнүүдээр эмхидхэгдэнэ:

- «Баатар Мэргэн» - хэжэ ябаһан ажалдаа амжалта туйлаһан, нютаг оронойнгоо хүгжэлтэдэ горитой хубита оруулһан 60 хүрэтэр наһанай эрэ

хүн;

- «Гуа сэсэн хатан» - хэжэ ябаһан ажалдаа амжалта туйлаһан, нютаг оронойнгоо хүгжэлтэдэ горитой хубита оруулһан 60 хүрэтэр наһанай эхэнэр хүн;

- «Сагаан үбгэн» - олоной дунда хүндэтэй, хэһэн ажалаараа бүгэдын һайшаал магтаалда хүртэһэн 60-һаа дээшэ наһанай эрэ хүн;

- «Эмгэн буурал эжы» - олоной дунда хүндэтэй, хэһэн ажалаараа бүгэдын һайшаал магтаалда хүртэһэн, эхын нангин уялга жэншэдгүй һайнаар бэелүүлһэн 60-һаа дээшэ наһанай эхэнэр хүн;

- «Аламжа Мэргэн Арюун Гоохон хоёр» - гэр бүлынгөө гал гуламтые һайханаар тахижа, бэе бэедээ түшэг тулга боложо, үхибүүдээ эрхим һайнаар хүмүүжүүлжэ, жэшээ болохоһоо гадна хэһэн ажалдаа амжалта туйлаһан айлнууд;

- «Абарга малшан» - хүдөө нютагта амидаржа, үндэһэн ажахыгаа эрхилһэнэй ашаар нютаг оронойнгоо байдал үргэжэ байһан хүнүүд;

- «Баатарай соло» - сэрэгэй тусхай ябуулгада (СВО) хабаадажа, баатаршалга харуулһан сэрэгшэн;

- «Буян хэшэг» - сэдьхэлэйнгээ уряагаар буян хэжэ, бусадта туһаламжа хүргэжэ ябаһан хүнүүд.

1. Конкурс майн 15-һаа ноябриин 1 болотор үнгэргэгдэнэ. Тэрэнэй дүнгөөр шэглэл бүхэндэ илагшад элирүүлэгдэхэ.
2. Илагшадта ба хабаадагшадта дипломууд ба дурасхаалай бэлэгүүд барюулагдаха.
3. Шангуудые барюулгын баяр ёһолол 2026 оной декабрь һарада Х. Намсараевай нэрэмжэтэ Буряадай гүрэнэй академическэ драмын театрта үнгэргэгдэхэ.

III. Конкурсдо хабаадаха гурим

1. Конкурсдо хэншье хабаадаха аргатай.
2. Конкурсдо хабаадаха гэбэл, зураглалай геройн ажаһуудаг нютагай (тосхоной, хотын, аймагай) захиргаанһаа, ажалладаг (ажаллаһан) албан зургаанһаа гү, али ямаршье олониитын эмхиһээ мэдүүлгэнүүдые бүридхэхэ ёһотой.
3. Конкурсдо хабаадахын тула эмхидхэлэй түлбэри 1000 түхэриг түлэхэ хэрэгтэй.
4. Хабаадагшын хубиин мэдээнүүдые согсолхо зүбшөөл (согласие на обработку персональных данных участника) үгэхэ.
5. Конкурсдо хабаадахын тула эмхидхэлэй хорооной хаягаар удаадахи зүйлнүүдые дурадхаха:

а) хабаадаха тухай мэдүүлгэ – тэрээн соогоо хабаадагшын нэрэ обог, тэрээнтэй холбоо бариха мэдээсэл (телефоной дугаар, сахим хаяг);

б) конкурсдо хабаадагша тухай зураглал – тэрээн соогоо хабаадагша тухай хөөрэхэдөө, ямар амжалтануудайнгаа ашаар илалта туйлаха ёһотойб гэжэ тодорхойлон бэшэхэ;

в) конкурсдо хабаадагшын дүрэ зураг (6*9 см хэмжээнһээ бага бэшэ), үгы һаа, JPЕG түхэлөөр эльгээхэ.

1. Зураглалнуудые бүридхэхэ эрилтэнүүд
2. Зураглалнуудаа «Буряад үнэн» Хэблэлэй байшанай e-mail-хаягаар эльгээхэ: unen@govrb. ru, али гэбэл, Улаан-Үдэ хото, Каландаришвилиин гудамжа, 23 хаягаар 52-дохи кабинедтэ флешкэ дээрэ бэшээд оруулжа үгэхэ.
3. Timеs New Roman шрифтээр 14 хэмжээнэй үзэгүүдтэй 3 хуудаһанһаа дээшэ байха ёһогүй;
4. Гэрэл зураггүй ажалнууд абтахагүй.
5. Зураглалнуудай түлөө авторнууд харюусаха.
6. Конкурсын дүнгүүдые гаргалга ба илагшадые элирүүлгэ
7. Конкурсын жюри дүнгүүдые гаргана ба илагшадые тодорхойлно.
8. Конкурсын илагшадые элирүүлэн гаргахада, хабаадагшадай гаргаһан габьяа, туйлаһан амжалтанууд, мүн үргэн олониитын зүгһөө тэдээндэ үгтэһэн сэгнэлтэ хараада абтана.

Эмхидхэлэй хороон