433
Сахюусадай аршалалта доро
Гэрэй элдэб янзын ургамалнууд, сэсэгүүд, жэмэстэ модод болон тэдэнэй дүрсэ зурагууд г.м. геомантиин зурхайн талаар дутагдалнуудые заһажа, гэрэй байдалые аршалан һайжаруулха аргатай.
Эгээл олондо мэдээжэ Дуйнхорай “Намчу Вандэн”, «Найман тахил», үүдэн дээрэ үлгэдэг «Хорото абарга абаахай» (скорпион), могой г.м. буддын шажанай һахюуһанууд хүсэтэйгөөр туһалдаг убадистай. Тиигэбэшье хаа-яа зарим нэгэн ушарнуудта, тэдэнэрэй добтололгонуудые алдажархиһан ушарнууд болодог.
Эндэ хүнэй үйлын үри, хубиин шалтагаан, заяанайнь үйлэ хэрэгүүдынь ба хүсэл эрмэлзэлынь шалтагаанууд боложо тодорхойлдог.
Дээдын болбосоролтой зарим хүнүүд оршон тойронхи орон зайһаа хамаг муу муухайе дэгдээжэ һалгадаг. Тиимэ тусхай зоной тоо үсөөн ха юм. Бидэ, юрын һүзэгшэ хүнүүд, буддын шажанай эрдэм ухаанай мэдэсэнүүдые, сэсэн һургаалнуудые ба мянгаад жэлэй баян дэлгэр дүй дүршэлые хэрэглэжэ һураха ёһотойбди.
Алтан мэлхэй баялиг үршөөдэг
Түбэд геомантиин эрдэмэй һургаалнууд хүнэй гэр байрын дотор ба гадаа талануудай аршалагша дүрбэн сахюусадтай бүхэ холбоотой. Тэдэнэр бүхы дэлхэйгээр элитэ болоһон, элдэб олон үндэһэ яһатанаар шүтэгдэдэг: Сагаан бар (зүүн зүгэй сахюусан), Хүхэ номин луу (урда зүгэй сахюусан), Улаан гарууда (баруун зүгэй сахюусан), Алтан мэлхэй (хойто зүгэй сахюусан).
Тиигээд гэрэй дотор талын сахюусадай бүридэлдэ үшөө 5-дахи сахюусан нэмэгдэдэг – Алтан бишэн.
Хэрбэеэ гэрэй тэг дунда Алтан бишэн сахюусанай заларжа мандаагүй һаань, эзэндэнь оюун сэдьхэлэй ба бурхан шажанай замда орохонь ехэ бэрхэшээлтэй байдаг гэжэ хэлэгдэнэ. Тэдэ нангин номуудые үзэжэ, дүй дүршэлнүүдые шудалбашье, олон тоото бэрхэшээлнүүдтэй ушардаг.
Түбэдэй саче эрдэмээр, Сагаан бар – бэеын элүүр энхые ба ута наһа, Хүхэ номин луу – ерээдүйн амжалта туйлалтануудые, ажал тушаалаар дэбжэлгэ, Улаан гарууда – аршалалта, хамгаалга, Алтан мэлхэй эд баялиг үршөөдэг заяатай.
Хэрбэеэ эдэ сахюусадые гэрэйнгээ дотор ба гадаа талануудта зүбөөр залажа табибал, саче геомантиин муу тэмдэгүүдынь 70 процентээр һалажа заһардаг. Хүнэй гэр байрада эрхим һайн оршон байдал тогтодог.
Мушхамал могойн дүрсэтэй
Үшөө могойн дүрсэ - эрхим һахюуһан! Тус мүлхигшэ амитан хүниие дээдын түбинүүдтэй холбодог “ДМУ мушхамал” (“канат ДМУ”) гэһэн нангин һүлдэтэй.
Домогоор урдын Түбэд орондо 13 хаашуул толгойнгоо оройдо “ДМУ мушхамал” гэһэн сахюусантай байһан гэдэг. Тэдэнэр булта сэсэн мэргэн ухаатай, асари ехэ хүсэтэй, гайхамшагта арга боломжонуудтай байһан гээд түүхэдэ ороһон. Тиигээд наһанайнгаа эсэстэ хүрэхэдөө, тэдэ хаашуул “ДМУ мушхамал” соогоо хайлажа шэнгээд, дээдын түбинүүд руу заларжа ошоһон түүхэтэй.
Гансал муу аашануудтай 13-дахи хааниие улад зониинь баряад, “ДМУ мушхамал” гээшыень отолжо таһалһан байгаа. Тэрэ ушараар хаан дээдэ түби руу мордохо аргагүй болоо һэн ха. Тиимэшье ушарнууд болодог юм даа! Эндэ эгээл шухалань, “ДМУ мушхамал” сахюусантай хүн арюун сагаан сэдьхэлтэй байха, буянта хэрэгүүдые үйлэдэхэ ёһотой.
“ДМУ мушхамал”, үнэн дээрээ, хүнэй байдалай элдэб олон талануудта ба байгаалидашье үзэгдэдэг. Жэшээнь, саһаар хушагдаһан оройтой үндэр уула хадые сахариглан хүреэлһэн дүрсэтэй үүлэнүүд....
Хүнэй гэр байрын тэг дунда дээрэһээ элшэтэн гэрэлтүүлһэн һаруул гэрэл туяанууд – “ДМУ мушхамалай” һүлдэтэй. Жэшээнь, залай потологто үлгөөтэй ялагар гэрэлтэй томо гоё люстрэ ехэ һайн нүлөө үзүүлдэг, аршалдаг.
Харин урдын нүүдэлшэдэй һэеы гэрэй оройн тооно “ДМУ мушхамалай” үүргэ һүлдэтэй гэжэ саче геомантиин һургаалнууд соо хэлэгдэнэ. Һэеы гэрэй оройн “сонхо” – тооноор одо мүшэдэй, һара наранай элшэ туяанууд ёһото аршалагша сахюусадаар заларан орожо адисладаг һэн ха.
Элшэ туяа сасарһан Алтан бишэн
Түбэдэй геомантида һэеы гэрэй тооно байрын тэг дундахи оршон зайе аршалагша сахюусан – Алтан бишэн гээд нэрлэгдэдэг.
Мүнөөнэй сагта гэрэй дээдэ талаһаа гэрэлтэн сасарһан ямаршье элшэ туяанууд (люстрэ, лампочка г.м.) Алтан бишэнэй һүлдэ гэжэ тоологдодог. Хитадай фэн-шуй һургаалаар, гэрэйнгээ тэг дундахи залай потологто ялагар гоё ба томо болор шэл (хрусталь) люстрэ үлгэхэдэ, эрхим һайн нүлөөтэй.
Алтан бишэн ганса тиимэ һүлдэ тэмдэгтэй бэшэ юм. Дээрэһээ сасарһан элшэ туяануудһаа гадна тэрэ гэрэй эгээл томо ба шухала таһаг болохо залай тэг дунда байрладаг. Гансал тэндэ уужам сүлөөтэй байха ёһотой.
Үшөө гэрэй табадахи сахюусан залай тэг дунда табигдаһан томо түхэреэн шэрээ дээрэ дуратайгаар байрладаг. Баян дэлгэр эдеэ хоолтой, гоё һайхан амһартатай шэрээгэй саана сугларан һуужа, баяртайгаар һайндэрнүүдые угтахада, гэр бүлынгөө шухала баяр ёһололто үдэрнүүдые тэмдэглэхэдэ, Алтан бишэн дуратайгаар залардаг.
Эндэ түбэдэй саче хэрээһэтэ шажанай заншалтай адли ёһо гуримтай юм. Үнэн алдартанай заншалаар, эдеэлдэг шэрээ “бурханай альган” гээд нэрлэгдэдэг, нангин шүтөөнэй тоодо ородог юм. Жэшээнь, тэрээн дээрэ хүлнүүдээ табихань огто хорюултай ба шанга сээртэй!
Саче эрдэмээр, эдеэнэйнгээ шэрээе арюун сэбэрээр байлгаха, шэмэглэхэнь ехэ шухала. Тэрэниие тойрожо һуугаад, арсалдаха хэрэлдэхэнь хорюултай. Гэрэй табадахи сахюусан – Алтан бишэн тэндэ байрладаг ха юм! Үшөө эдеэнэйнгээ шэрээе тойроод, эзэд өөр өөрын һууритай байха ёһотой.
Үшөө гэр байрын тэг дунда томо бахана (колонно) бии һаа, мүн лэ табадахи сахюусан болохо аргатай. Тэрэ юртэмсэ дэлхэйн тэг дундахи Сүмбэр уулые һүлдэлдэг. Баханые дээдын бурхадай, али гэбэл, элинсэг хулинсагуудайнгаа дүрсэнүүдээр, зол жаргалай угалза тэмдэгүүдээр шэмэглэдэг.
Алтан бишэн гэһэн гэрэй табадахи сахюусан дээдын бурхадтай, нангин шүтөөнтэй холбоое һүлдэлдэг. Гэрэйнгээ тэг дунда байхадаа, толгойгоо дээшэнь үргэжэ хараад, дээдын сахюусадта шүтэн зальбардаг, абарал аршалалта гуйдаг.
Баярма БАТОРОВА бэлдэбэ
Фото: yandex.ru
