Эрхим багшанараа дэмжэе!

Тус хэмжээ ябуулга түрүүшынгээ ойн баярые тэмдэглэнэ, энэ удаа табадахи конкурс эмхидхэгдэнэ.

Бүхы дээрээ 131 хабаадагша ерэхэ гээд эмхидхэлэй хороон дуулгана. 87 можо хизаарай 85 багша, хүүгэдэй сэсэрлигэй 46 хүмүүжүүлэгшэ гээд тоологдоно. Хабаадагшадтай танилсалга конкурсын Вконтакте бүлгэмдэ эхилэнхэй. Тэрэ августын дүүрэтэр үргэлжэлхэ.

Буряад Уласта эрхимлэһэн Улаан-Үдэ хотын 67-дохи «Подснежник» гэһэн сэсэрлигэй багша Баирма Цыреновна Гумпылова, Улаан-Үдэ хотын 29-дэхи буряад гимназиин буряад хэлэнэй багша Арюна Рабдановна Цыжипхенова гэгшэд мүрысөөндэ ошохоо бэлдэжэ байнхай.

Липецкдэ буряад хэлэн нэгэтэ бэшэ зэдэлхэ юм. Үбэр Байгалай хизаарай Алдар Цыденжаповай нэрэмжэтэ Агын 1-дэхи һургуулиин Дарима Гончиковна Бадмажапова, Эрхүүгэй можын Усть-Ордын Буряадай тойрогой Боохоной аймагай Тарасын дунда һургуулиин Валентина Ивановна Бадагуева, Эрхүүгэй можын Усть-Ордынский тосхоной 7-дохи “Колосок” сэсэрлигэй нэмэлтэ һуралсалай багша Оксана Александровна Шабалова гэгшэд түрэл буряад хэлэеэ дамжуулха.

Хэды хэлэн дээрэ хабаадагшад хөөрэлдэхэб гэжэ үшөө хүсэд тоологдоогүй байна. 2025 ондо Улаан-Үдэдэ болоһон энэ конкурсдо 37 хэлэн дээрэ эрхим хэшээлнүүдые хабаадагшад дурадхаа һэн. Буряадай ниислэлдэ багшанарай дунда Липецкын можын Юлия Ситникова, хүмүүжүүлэгшэдэй дунда Хальмаг Уласай Виктория Настаева гэгшэд түрүүлээ бэлэй гээд һануулая.

Уржадэр, августын 17-до конкурсын түрүүшын шата эхиеэ абаба. Олоной анхаралда хабаадагшад өөрынгөө медивизиткэ дурадхана. Хүн бүхэн вконтакте гэһэн сүүлжээндэ “Лучший учитель родного языка и родной литературы” бүлэгэй видеотой хуудаһанда орожо, хабаадагшадай танилсалгын бүтээл хараха аргатай. Өөрынгөө нютагайнгаа багшанарайнгаа түлөө дуугаа үгэе! Арюна Цыжепхенова Баирма Гумпылова хоёрой видео доро лайк табиха хэрэгтэй.

Арюна Цыжепхеновагай видео.

Баирма Гунтыповагай видео.