287
Буряад Уласай Толгойлогшо Алексей Цыденов ба «Россети Сибирь» компаниин генеральна захирал Антон Дьячков гэгшэд апрелиин 17-до Улаан-Үдэ хотодо уулзаба.
Уулзалгада нютаг можо зайн галаар найдамтайгаар хангалгын, «Сэбэр агаар» гэжэ холбоото уласай түсэл бэелүүлгын асуудалнууд харагдаа. Буряад ороной зайн галаар хангалгын комплекс олон жэлэй туршада мүнгэн зөөриин багаар һомологдоһон ушарһаа хэсүү хүндэ байдалда оронхой. Тиимэһээ уулзалга дээрэ регуляторна хэлсээ баталалгада онсо анхарал хандуулагдаа.
Буряад Уласай Толгойлогшо Алексей Цыденовэй тэмдэглэһээр, зайн галай объектнүүд хуушаржа, нютаг можын ба «Россети Сибирь» компаниин хүтэлбэриин һанаа зобооно. Нютаг можо эдэбхитэйгээр хүгжэнэ, шэнэ үйлэдбэринүүд байгуулагдана, Улаан-Үдэ хотын мастер-түсэб бэелүүлэгдэнэ, шэнэ гэрнүүд баригдана, ажаһуугшад зайн галаар гэрээ дулаасуулна. Тиимэһээ зайн галаар хангалга найдамтай болгохо эрилтэ табигдана.
«Россети Сибирь» компаниин генеральна захирал Буряад Уласта 2025 оной заһабарилгын программа, дулаасуулгын хаһада зайн галай һужаануудые бэлдэлгэ тухай хөөрэхэһөө гадна подстанцинуудай ажал ондоо болгохо, уялга даабарииень зүбөөр хубааха хэрэгтэй гэжэ тэмдэглэбэ. Тиихэдэ Буряад ороной ажаһуугшадые, шэнэ объектнүүдые зайн галаар таһалгаряагүй, найдамтайгаар хангахын тула регуляторна хэлсээ баталха хэрэгтэй, энэ аша үрэтэй шиидхэбэринүүдэй нэгэн гэжэ Антон Дьячков хэлэбэ.
««Россети Сибирь» компанида ондоо нютаг можонуудтай регуляторна хэлсээ баталалгын амжалтатай дүй дүршэл бии. Мүнөө жэлдэ Кузбасста хэлсээнэй ашаар зайн галай һужаануудые заһабарилгын үргэн дэлисэтэй программа бэелүүлэгдэхэ. Омскын ба Томскын можонуудта иимэ хэлсээн мүн баталагдаа. Тэрэнэй ёһоор ажаһуугшадта түлбэриин тогтууритай байдал үзэгдэнэ, зайн галай һалбариин ажалшадта һужаануудые хүгжөөлгэдэ гаршыень хүсэлдүүлхэ арга үгтэнэ. Буряад Уласта түхеэрэлгэнүүд хуушараа, зайн галай обьектнүүдтэ улам ехэ хүсэ шадал хэрэгтэй болоно, тиимэһээ регуляторно хэлсээ баталха гээшэ шухала алхам болоно», – гэжэ «Россети Сибирь» компаниин генеральна захирал Антон Дьячков тэмдэглээ.
Уулзалгада хабаадагшад хэлсээ баталалгын хараа хэмжээнүүд тухай хөөрэлдөө. хоёр талын гар табилгатай данса нютаг можодо зайн галай комплекс хүгжөөхэ, һужаануудай найдамтай шэнжэ, зайн галаар хангалгын шанар һайжаруулха.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
