Буряад Уласай Хэжэнгэ һууринда талаан бэлигтэй хүүгэдэй лицейн шэнэ байшан нээгдэбэ

Апрелиин 30-да В.С. Мункинай нэрэмжэтэ лицей Хэжэнгын аймагай Хэжэнгэ һууринда нээгдэбэ. Нэгэ халаанда 184 һурагшые багтааха аргатай шэнэ байшан үндэһэтэнэй «Болбосорол» түсэлэй хэмжээндэ баригдаа.

Буряад Уласай Толгойлогшо Алексей Цыденов энэ ушараар үхибүүдые, гэртэхиниие, багшанарые амаршалба.

 - Шэнэ һургуулинуудай нээгдэхэдэ, ехэ гоё. Энэ үедэ би тон жаргалтайб. Манай үхибүүдтэ бүхы харгынууд нээгдэжэ байхыень хүсэнэб. Лицейдэ һуража байхадаа, үнэхөөрөө, бүхы харгынуудые нээхэ аргада таанад хүртэнэт. Эндэ һуража гараһан олон үхибүүд эрхим дүнгүүдые харуулжа, манай уласай, гүрэнэй ёһотой эрхэтэд болоо. Тэдэ манай омогорхол! Эндэһээ ерээдүйн эрдэмтэд, геройнууд, Буряад уласаа, Эхэ ороноо хүгжөөхэ зонууд урган гараха, найданаб, - гэжэ Буряад Уласай Толгойлогшо Алексей Цыденов хэлэбэ.

Лицейн түүхэ 90-ээд онуудһаа эхиеэ абана. Буряадай гайхамшагта эрдэмтэн, Россиин болбосоролой Академиин гэшүүн Петр Родионович Атутовай үүсхэлээр тус һуралсалай эмхи Росси дотор хүдөөгэй түрүүшын лицей болоһон байна. Хүдөө нютагуудай талаан бэлигтэй үхибүүдые шэлэн абажа һургаха зорилго һургуулиин урда табигдаа.

- Лицейдэ тамирай зал урид байгаагүй, үхибүүд тааруулагдаһан модон гэрнүүд соо һурадаг һэн. Корпусуудай нэгэниинь ондоо үйлсэдэ байгаа. Мүнөө эндэ ехэ бэрхэ багшанар хүдэлнэ, урагшаа һанаатай хүүгэд һурана, тэдээндэ тааруу зохид оршон байгуулагдаа. Аба эжынэртэй, шабинартай хамта һургуулияа шэмэглэхэ тухай бодомжолообди. Тиин үхибүүдэй хүгжэлтэдэ туһатай мэдээсэлнүүдээр шэмэглэхэ гэжэ шиидэһэн байнабди. Һургуулиин ханануудта мэдээжэ зоной портредүүдые, Буряад ороной, Россиин суута газарнуудай куар-кодтой, богонихон мэдээсэлтэй зурагуудые үлгөөбди, - гэжэ лицейн захирал Интерна Эрдынеева хөөрэбэ.

Шэнэ байшан дотор хэрэгтэй түхеэрэлгэнүүд табигдаа, эмнэлгын таһаг, тамирай зал бии болоо, эдеэ хоол бариха газар зохёогдоо. Лицейн дэбисхэр дээрэ хэмэл хушалтатай 2 талмай баригдаа, эхин классуудай һурагшад наадаха талмайтай болоо. Һургуулида сэрэгэй тусхай үйлэ хэрэгүүдтэ хабаадаһан Аюр Балдандоржиевай нэрэмжэтэ алдар солын зал мүн нээгдээ.