Улаан-Үдэдэ һургуули дүүргэгшэдтэ медальнууд барюулагдаа

Үсэгэлдэр, июлиин 8-да, Улаан-Үдэдэ Илал­тын хүшөөгэй дэргэ­дэ 2025 ондо Улаан- Үдын һургуулинуудые дүүргэгшэдтэ «Һуралсалдаа туйлаһан амжалтануудай түлөө» гэһэн медаль барюулгын ёһолол баярай оршон­до үнгэрөө.

Байгша ондо Буряа­дай ниислэл хотын 394 һурагша медаль­да хүртөө. Тэдэнэй 222-ынь – алтан медаль, 172-ынь мүнгэн медаль абаһан байна. Ехэ һургуулида ороходо, алтан ме­даль – 10 балл, мүнгэн медаль 3 балл нэмэдэг гээд хэлэлтэй.

Буряад Уласай Толгой­логшо һургуулияа амжалта­тайгаар дүүргэһэн бэлигтэй үхибүүдые амаршалаа.

- Таанадта нютагтаа һураха, ажаллаха, түбхинэхэ хүсэл түрүүлхэ талаар хото­ёо, уласаа бүри гоё, һайхан болгохо гэжэ ехэ ажал ябуулнабди. Байгша ондо, Эсэ­гэ ороноо хамгаалагшадай жэлдэ, Эсэгэ ороноо хам­гаалгын Агууехэ дайнай үе дурсажа, гүрэнэймнай бүхы арад түмэнэй баатаршалгаар туйлаһан Агууехэ Илал­та тэмдэглэжэ байхадаа, таанарта мүнөө хүшөөгэй дэргэдэ медальнуудые ба­рюулнабди. Таанар баһал Эхэ оронойнгоо хамгаалаг­шад болохот гэжэ бата эти­гэнэб. Өөрынгөө ажалаараа, өөрынгөө оролдолгоороо Эхэ ороноо бүри хүсэтэй бол­гожо, аршалжа ябахат. Хүн бүхэндэ эгээл сэнтэй түрэл нютагтайбди гэжэ хододоо һанажа ябахыетнай хүсэнэб. Ажабайдалай үргэн харгы­тай, эхилһэн хэрэгүүдтээ амжалтатай, сагай ямар­шье эрилтэнүүдые дабаха хүсэлтэй, жаргалтай ябаг­ты. Түрэл нютагтаа дуратай Орос гүрэнэйнгөө ёһотой эрхэтэд, Буряадайнгаа омо­горхол боложо ябахыетнай хүсэнэб, - гэжэ Алексей Цы­денов хэлэбэ.

Улаан-Үдын һургуулинуудые байгша ондо 11-дэхи клас­суудай 2847 һурагша дүүргээ. Медаль абагшадай тоогоор Улаан-Үдын 61-дэхи болон 10-дахи РЖД лицейнүүд, 35-дахи, 49-дэхи һургуулинууд, 3-дахи, 33-дахи гимназинууд түрүүлээ.

- Медаль абагшадай, һургуули дүүргэгшэдэй зүгһөө Буряад Уласай Толгойлогшо Алексей Самбуевичта, хо­тымнай мэр Игорь Юрьевич­та эрдэм мэдэсэтэй болохо, алтан медаляар һургуули дүүргэхэ талаар таатай зо­хид оршон байгуулһандань, баяраа мэдүүлнэб. Болбосо­ролой һалбарида хүдэлдэг мэргэжэлтэдтэ, илангаяа баг­шанартаа, бидэниие эрдэм мэдэсын юртэмсэдэ хүтэлэн дахуулһан найдамтай һурган хүмүүжүүлэгшэдтээ һайниие хүргэнэб, - гэжэ 32-дохи гим­нази дүүргэгшэ Анна Намса­раева хэлэһэн байна.