474
2024 оной декабриин 23-һаа Тимур Цыбиков сэрэгэй тусхай үйлэ хэрэгүүдэй эгээл шухала, орёо Времьевскэ шэглэлдэ 218-дахи танкова полкын бүридэлдэ байлдаануудта хабаадана. Тэрэнэй нюуса нэрэнь «Хилок» юм.
2025 оной февралиин 22-то штурмовой 3-дахи мотострелково ротын бүридэлдэ тэрэ дайсадһаа эзэлһэн газараа баталан хамгаалха байлдаанда хабаадалсаа. Манай сэрэгшэдэй эзэлһэн газарта дайсадай добтолходо, Тимур Цыбиковтэй хамта дайлалдажа байһан нүхэр хүбүүниинь хүлөө ехээр шархатажа, ябажа шадахаяа болёо һэн. Украинын сэрэгэй миномётно буудаан доро өөрынгөө ами наһа гамнангүй, Тимур нүхэрөө байлдаан сооһоо гаргажа, эмнэлгын түрүүшын туһаламжа хүргэжэ шадаа.
Удаань байлдаанайнгаа газарта бусажа, ехээр сухалаа хүрэһэн хүбүүн Дегтярёвой гар пулемёт тодхожо, дайсадай тэрьедэтэр буудажа мэдээ. Байлдаанай бага замхахада, «Хилок» шархатаһан нүхэрөө эмнэлгын полевой пунктда хүргэжэ шадаа. Эрэлхэг зүрхэтэй мэргэжэнги сэрэгшын суг дайлалдажа ябаһан нүхэртөө саг соонь зүбөөр эмнэлгын түрүүшын туһаламжа үзүүлһэнэй ашаар тэрэ нүхэрынь түргэн эдэгэжэ, сэрэгтээ бусаһан байна.
2025 оной майн 28-да манай сэрэгшэ хүбүүн Украинын зэбсэгтэ хүсэнэй шухала объектнүүд, байлдаанай бүхэлэлтэнүүдые усадхаха талаар сэрэгэй даабари дүүргэжэ байгаа. Байлдаанай тон шухала газарта дайсад өөһэдынгөө опорно пункт табижа, манай сэрэгэй добтолходо, буудажа эхилээ. Тэрэ пунктыень эзэмдэхэ гэһэн даабари Тимур Цыбиковэй штурмовой бүлэгтэ даалгагдаа. Байлдаанай газарые манай сэрэгшэд һайнаар шэнжэлжэ, дайсадта ойлгогдонгүй, нюусаар добтолоо. Гэнтэ дээрэһээнь буужа ерэһэн сэрэгшэдые харахадаа, дайсад эмхигүй боложо, байлдаанай газарһаа зугадажа мэдээ. Дайсадай опорно пунктые манай сэрэгшэд эзэмдээд, ВСУ-гай хоёр контр-добтолго даража шадаһан юм. Энэшье байлдаанай үедэ «Хилок» суг дайлалдажа байһан нүхэдтөө эмнэлгын түрүүшын туһаламжа үзүүлжэ, тэдэнээ аюулгүй газарта хүргэжэ, эвакуационно бүлэгтэ тушаагаа. Тимур хүбүүнэй эрэлхэг зоригтой хэмжээнүүдые абаһанай ашаар гээлтэгүйгөөр дайсадай пункт эзэлэгдэжэ, шухала сэрэгэй ерэтэр, манай сэрэгшэд тэрэнээ эзэлжэ шадаһан байна.
Сэрэгэй тусхай үйлэ хэрэгүүдтэ үнгэржэ байһан байлдаанда эрэлхэг зоригой түлөө Тимур Далаевич Цыбиков Оросой Холбоото Уласай гүрэнэй шагналнуудаар – «Шэн зоригой түлөө» болон Суворовой медальнуудаар шагнаха гэжэ зууршалагданхай.
218-дахи танкова полкын командир, полковник Н.ДОЛА
Н.Дола гэгшын дурадхаһан гэрэл зураг
