Шэлэн абалгын харалга

Алас Дурна зүгэй федеральна тойрогой универсальна тулалдаагаар мүрысөөн дүрбэдэхи жэлээ Улаан-Үдэдэ наһанай табан бүлэгтэ үнгэргэгдэбэ. Буряадай тамиршадай ехэ амжалтын ашаар иимэ ехэ мүрысөөн эмхидхэгдэнэ гээд хэлэлтэй.

Дзюдо барилдаагаар 1976 оной Олимпиин наадануудай абарга Сергей Новиков 1996 ондо тамирай шэнэ зүйл зохёоһон байна. Тэрэнь Орос гүрэн дотор “Русский бой” гэжэ нэрлэгдээ, уласхоорондын хэмжээндэ “Универсальный бой” гээд, шэнэ зүйл хүгжэжэ эхилээ бэлэй.

Универсальна тулалдаанай һаял хүгжэжэ эхилхэдэ, Буряадай багшанарай колледжын дэргэдэ һоригшо Леонид Михайлович Сиратов тамиршадые шэнэ зүйлөөр бэлдэжэ эхилээ. Һуралсалай гуламтын хүтэлбэрилэгшэд залуу багшые дэмжэһэн байна. Колледждо бэлэдхэлэй тусхай бааза түхеэрэгдээ, ходо туһаламжа үзүүлэгдэжэ байгаа гээд хэлэлтэй.

Тиигэһээр хэдэн үе нэрэ солотой тамиршад бэлдэгдээ. Гурба дахин дэлхэйн чемпион болоһон Даша Жамбаловта “Орос гүрэнэй спортын  габьяата мастер” гэһэн нэрэ зэргэ хүртэһэн тухай үнэмшэлгэ тус хэмжээ ябуулгын үедэ барюулагдаба. Даша хадаа Буряадай универсальна тулалдаашадай дунда иимэ үндэр нэрэ зэргэдэ хүртэһэн түрүүшын тамиршан болоно.

Февралиин 6-8-ай үдэрнүүдтэ болоһон мүрысөөндэ Алас Дурна зүгэй 5 можо хизаарай 400 гаран тамиршан Буряадта айлшаар бууһан байна. Тэдэнэй тоодо талмайн эзэд эгээл нэрэ зэргэтэй байгаа гээд хэлэлтэй. Юуб гэхэдэ, һүүлэй 2-3 жэлэй хугасаада тэдэ холо ойгуур нютаг нугаяа суурхуулжа, дэлхэйн чемпионадуудта түрүү болон шангай һууринуудые эзэлнэ.

- Хүүгэдэй дунда универсальна тулалдаагаар эдиршүүлнай ялас гэмэ амжалтануудые туйлана. Ниислэлэй дэргэдэхи Сосновый Бор һууринда ЦСКА гэһэн клубай дэргэдэ һайн бэлэдхэл хэгдэнэ. Мүн Аэропорт һууринда һоригшо хүдэлдэг болонхой. Хяагтын, Ивалгын, Яруунын аймагуудай тамиршад амжалтануудые туйлана. Алас Дурна зүгэй федеральна тойрогой мүрысөөнэй наһанай дүрбэн бүлэгтэ эдэмнай олон тоото медальнуудые абажа шадаба, - гэжэ Леонид Сиратов залуу халааниие амаршална.

Алас Дурна зүгэй федеральна тойрогой мүрысөөн сэрэгэй тусхай үйлэ хэрэгүүдтэ хабаадажа, баатарлиг үхэлөөр унаһан Агван-Жамса Банзановай мүнхэ дурасхаалда зорюулагдаа. Тэрэ Буряадай багшанарай колледждо һурахадаа, футболоор бэеэ һоридог һэн, ерээдүйнгөө мэргэжэлээр уласай болон бүхэроссиин мэргэжэлтэ урилдаануудта амжалтатайгаар хабаадагша һэн. Сэрэгэй албанай һүүлээр универсальна тулалдаанда ябажа, яһала амжалтануудые туйлаһан юм.

Жэл бүри Агван-Жамсын эжы аба, түрэлхид олоороо ерэжэ, өөрын гэр бүлын бэлэгүүдые шалгарһан тамиршадта барюулна. Энэшье удаа тэдэ шан барюулгын баяр ёһололдо хабаадалсаа.

Тус хэмжээ ябуулгада универсальна тулалдаанай гурбан шэглэлээр (“лайт”, “классик”, “защита”) шанга тэмсээнүүд болоһон байна. Эндэ шалгарһан тамиршад өөр өөрын наһанай бүлэгүүдтэ Оросой чемпионадта хабаадаха эрхэдэ хүртөө.

Февраль һарын һүүл багаар Буряадай багшанарай колледжын дэргэдэ үбэлэй универсальна тулалдаагаар мүрысөөн болохоор хараалагдана. Эндэ тамиршад санаар урилдажа, пневматическа винтовкоор буудаһанай удаа саһан дээрэ барилдаха юм.