Мандагановай зохёохы мастерской

Тус түсэл бэелүүлхэ тухай хэлсээе Буряадай Толгойлогшо Алексей Цыденов болон Уран зурагай академиин юрэнхылэгшэ Василий Церетели хоёр һаяхана баталаа.

- Манай домог суута уран зурааша Юрий Мандагановта зохёохы мастерской нээхэ арга олгогдобо. Орос гүрэн дотор флоренциин мозаикаар бүтээхэ түрүүшын иимэ мастерской болоно. Юрий Ёндоновичой бүтээлнүүдынь дэлхэйдэ үргэнөөр мэдээжэ, Буряадай ниислэл хотын агаарай онгосонуудай буудалыешье, мүн түмэр замай буудалыешье шэмэглэжэ байдаг. Шэнэ зохёохы талмайн нээгдэхэдэ, уран зураашымнай арга бүри үргэдхэгдэжэ, үндэһэтэнэй түхэл маягтай мозаикын онсо техникын шэнэ үенүүдтэ дамжуулагдажа байхань һайшаалтай. Саашадаа Уран зурагай академиин дэмжэлгээр ажал ябуулгынгаа хэмжээе үргэдхэхэбди. Ганса манай можо  нютагуудһаа бэшэ, харин Монгол, Хитад болон бусад гүрэнүүдһээ бэлигтэйшүүлые һонирхуулха түсэбтэйбди, - гэжэ Алексей Цыденов тэмдэглээ.

 Бүхыдөө Оросой  Уран зурагай академиин зохёохы 15 мастерской Орос гүрэндэ хүдэлнэ. Академиин мастерскойнуудта һураха гээшэ аспирантурада һураһантай адли. Тэдэ, гол түлэб, Москва, Санкт-Петербург хотонуудта байдаг. Гадна Казань хотодо - оройдоол нэгэ уран зурагай мастерской, Красноярск хотодо гурбан мастерской (живопись, графика, скульптура) бии.

- Гүрэн дотор флоренциин мозаикаар ондоо мастерскойнууд үгы гэжэ тэмдэглэхэ байнаб. Тиихэдэ түрүүшынхиеэ иимэ зохёохы талмай Улаан-Үдэдэ нээхэмнай гээшэ. Энэ асуудал шиидхэхэ хэрэгтэ эдэбхитэйгээр хабаадаһандань, Буряадай Засагай газарта, Алексей Самбуевичта баярые хүргэнэб. Хамтадаа гайхамшагта уран зурааша Юрий Ёндоновичой һанал хүсэлые бэелүүлжэ, залуу уран зураашадта өөһэдынгөө үүсхэлнүүдые бүтээхэ арга боломжо олгожо байнабди. Шэнэ мастерской флоренциин мозаикын техникэ шудалха түб болохо, - гэжэ Василий Церетели хэлээ.

 Зохёохы мастерскойдо һуралсал гурбан жэл үргэлжэлхэ. Стажёрнуудта стипенди үгтэхэ. Һуралсалай үедэ оюутад өөһэдынгөө бүтээлнүүдые федеральна болон уласхоорондын үзэсхэлэнгүүдтэ дэлгэхэ аргатай байха.