Эдир урашуул элирнэ

Һүүлэй зургаан жэлдэ тус кружок Аюна Бадмацыреновна Бадмаева хүтэлбэрилнэ. Бэлигтэй багшынгаа хүсөөр үхибүүд ехэ юумэ хэжэ һурана.

- Уран бүтээлнүүдые хэхэдээ, элдэб зүйлнүүдые хэрэглэнэбди. Манай кружогто ябадаг үхибүүд бисерээр томожо шададаг, макраме хэрэглэн зурана. Элдэб модонуудые хюрөөдөөд асархадамни, өөһэдөө бэлдээд, дээрэнь гоё гэгшын зурагуудые бүтээжэ, гарай бэлэгүүдые бэлдэнэ. Хониной нооһоор, арһаар юумэ бага зэргэ оёнобди, - гээд, Аюна Бадмацыреновна хөөрэнэ.

«Алтаргана» нааданай үедэ Баянголой һургуулиин уран гартай хүбүүд, басагадай бүтээлнүүд Баргажанай аймагай һэеы гэр шэмэглээ. Тон ехээр гайхуулһан бүтээл гэхэдэ, үхэрэй дала дээрэ хэгдэһэн зурагууд болоно.

- Мүнөө үедэ хүн зон үхэр малда ямар яһан хаанань байдаг бэ гэжэ мэдэнэгүй. Үхэрэй дала иимэ томо юм гү гэжэ зарим хүнүүд асуугаад, гайхуулна. Үхэр малайнгаа дала ехээр сабшангүй, тэрэл зандань шанаад, мяхыень эдиһэнэй удаа маанадтаа үгыт гэжэ нютагайнгаа хүнүүдтэ, үхибүүдэйнгээ гэр бүлэнүүдтэ хэлэнэбди. Тэрээн дээрэ ямаршье юумэ гоёор зураха аргатайбди. Мүн бусадшье поделкэ хэжэрхихэбди гээд мэдүүлнэбди, - гэжэ Аюна Бадмацыреновна хөөрөөгөө үргэлжэлүүлнэ.

«Серебряные шкатулки» гэһэн кружогто ябадаг эрхин бэрхэ үхибүүдые нэрлэе. Илангаяа Алина Бадмаева, Наталья Очирова, Сэлмэг Бадмаева гэгшэдые магтахаар. Мүнөө жэлдэ Эржена Раднаева һургуулияа дүүргээ.

Бултанай тоодо уран гартай Виктория Бошиктуевае нэрлэхэ хэрэгтэй. Мүнөө жэлдэ 10-дахи класста ороһон басаган энэ хэмжээ ябуулгада хэдэн зурагуудые дурадхаа. Тэдэнь үхэрэй далын яһан дээрэ зурагданхай.

- 5-дахи класста һуража байгаад, «Серебряные шкатулки» гэһэн кружогой гэшүүн болоо һэм. Багаһаа хойшо ехэ зураха дуратайб. Тиимэһээ багшамни ганса саарһан дээрэ бэшэ, мүн бусад юумэн дээрэ зураг хэжэ һургаа. Эгээл түрүүшымни ажал гэхэдэ, тайрагдаһан хуһан модоной түхэреэн дээрэ зураг хээб. Эгээл ехээр хада уула, моридые зураха дуратайб. Юуб гэхэдэ, манайда адуун һүрэг бии. Ганса абамнай ехээр тэдэнэйнгээ хойноһоо харабашье, бидэшье баһа хаа-яандаа адуулалсадагбди. Иимэ үедэ моридые зураад лэ абадагби, - гээд, Виктория Бошиктуева хөөрэнэ.

Виктория хадаа Баянголойнгоо һургуули соогоо мэдээжэ һурагша юм. Аймагай болон уласай хэмжээ ябуулгануудта ходо амжалтатайгаар оролсоно. Эрдэм шэнжэлэлгын конференцинүүдтэ һонирхолтой элидхэлнүүдые бэлдээд хабаадана. Үнгэрһэн һуралсалай жэлдэ «технологи» гэһэн предмедээр уласай олимпиадада шангай һуури эзэлһэн байна.

Иигэжэ «Серебряные шкатулки» үрэ дүнтэйгөөр хүдэлжэ, бэлигтэй үхибүүдые элирүүлнэ, ажабайдалдань хэрэгтэй болохо дүршэл шадабари олгоно гэхэдэ, алдуу болохогүй.