Залитай уулзалганууд

Зунай зулгы хаһада амархаа ошоогүй ажаһуугшадые, Буряадай ниислэлдэ ерэһэн аяншалагшадые Исай Калашниковай нэрэмжэтэ хотын номой сан зугаа хүхюутэй уулзалгануудтаа урина. Иимэ үдэшэнүүд гуламтын дэргэдэхи «Руины» гэһэн арт-талмайда суббото бүхэндэ эмхидхэгдэнэ.

Үнгэрһэн долоон хоногой эсэстэ, августын 1-дэ, ээлжээтэ уулзалга болоһон байна. Иимэ хэмжээ ябуулгануудта хүнүүд олоор ерэхэдэнь гайхалгүй. Нэгэдэхеэр, иишээ орохонь миинтэ. Хоёрдохёор, һонирхолтой хүнүүд ерэжэ, бэлиг шадабарияа харуулна.

Августын 1-дэ болоһон хэмжээ ябуулгада «Аялга» гэһэн хамталиг буряад болон бусад арадуудай хүгжэм арадай зэмсэгүүд дээрэ наадажа, сугларагшадай шэхэ хужарлуулаа. Мүн дуунуудынь «Руины» арт-талмайһаа холо ойгуур сууряатаа.

Уран зохёолшо, хүгжэмшэн, дуушан Мария Киприевская олон жэлэй хугасаада түмэр рок, хартрок, металл гэхэ мэтэ шэглэлээр хүгжэм найруулдаг байһан юм. Һүүлэй 3,5 жэлэй хугасаада өөрынгөө шүлэгүүд дээрэ хүнгэн хүгжэм зохёодог болоһоноо сугларагшадаар хубаалдаа.

- Нэгэ үедэ һүниндөө унтажа шадахаа болишоод ябааб. Сэдьхэлэй даралгатай дайралдахадаа, ехэ айжа, ухаа алдадаг һэм. Иимэ оршондо ороһоной удаа зарим шүлэгүүдые бэшэжэ туршааб. Тэдэ үгэнүүдтээ хүгжэм найруулжа, гитара дээрэ дууладаг болооб. Сэдьхэлдээ бүри ехээр дарагдахадаа, гитараяашье орхёод байгааб. Нэгэ үглөөгүүр хүбүүмни бодоод, зүүдэеэ хөөрэжэ үгөө. «Вновь я верю в любовь», - гэжэ байгаад, эжынгээ дуулахые дуулааб, харааб», - гэжэ хэлээ. Абаһаар лэ үгэнүүдые зохёожо, дуу бэшэжэрхёоб. Энэ ехэ хүнгэн дуун, мүнгэ алтатай болоходоо, хүүгэдэй хоортой бэшэхээр түсэблэнэб, - гэжэ үнэн сэхээр Мария Киприевская хөөрэнэ.

«Вновь я верю в любовь», «Вода», «Феникс» гэхэ мэтэ дуунуудаа Мария энэ үдэшэ дурадхаа.

Шүлэгүүдые уранаар зохёодог залуу халаан ургажа ябана гэжэ эдэ үдэшэнүүд харуулна. Тэдэнэр эндэ уригдажа, уншагшадаараа түрүүшынгээ уулзалгануудта хабаадана, бэеэ харуулна гэхэдэ, алдуу болохогүй. Тэдэнэй тоодо Никита Перевалов, Людмила Квасова, Ирина Савельева болон бусадые нэрлэмээр.

Людмила Квасовагай хэлэһээр, залуу наһанһаа шүлэгүүдые бэшэжэ туршадаг юм. Элдэб юумэ сэдьхэжэ хараһан юумэниинь мүрнүүд болошодог лэ. Һаяхана ногоон талмай дээрэ тэрмээлжэ хаража, шүлэг зорюулаа.

- Угаа амар болошоо. Шүлэгүүдэй мүрнүүд ухаан бодолдошни ороходонь лэ, телефоноо гаргаад лэ бэшэжэрхинэб. Урид саарһа юумэ бэдэртэршни, хуу мартагдаад байгша һэн, - гэжэ Людмила Квасова энеэбхилэн хөөрэнэ.

Ирина Савельева артист мэргэжэлтэндэ зорюулһан шүлэгөө эгээл түрүүн уншаа. Өөрөөшье артист юм гү гэжэ сугларагшадай һанажа байхада: «Би Авиазаводто хүдэлнэб», - гэжэ тон ехээр айлшадые гайхуулаа.

- Удангүй авиациин мэргэжэлтэдэй һайндэр болохонь. Тэндэ өөрынгөө номтой үхибүүдые танилсуулхаб. Яагаад самолёт, вертолёт бүтээгдэнэб, агаараар ниидэнэб, хэн хэнэб гэжэ байгаад, шүлэглэмэл аргаар ном гаргаһан байнаб. Хажуугаарнь зураха дуратайб, картинануудые бэшэнэб, - гэжэ Ирина Савельева хөөрөөд, хэдэн шүлэгүүдээ уншажа үгөө.

Хоёр часһаа үлүү болоһон энэ уузалгада бусадшье бэлигтэйшүүл хабаадаа. Ерэхэ субботодо «Руины» гэһэн арт-талмай дээрэ дахинаа шүлэг, хүгжэм, дуун сууряатаха.