«Зунай бороон» ороо

Нэгэдэлэй хүтэлбэрилэгшэ А. А. Будаев «Зунай бороон» гэһэн ном бүридхэн хэблэһэн тухайгаа мэдээсээд, хүүгэдтэ зорюулагдаһан энэ бишыхан согсолбори тухайгаа хөөрэжэ үгэбэ.

16 авторнуудай зохёолнууд энэ ном соо оруулагдаа. Тэрэ тоодо Амгалан Будаев, Балбарма Дашиева, Тамара Занаева, Галина Ринчинова, Галина Базаржапова-Дашеева, Дарима Бабуева, Должид Даксанова, Нина Артугаева, Намсалма Доржипаланова, Соёлма Сам­буева, Тимур Гомбожапов, Туяна Рад­наева, Талана Цыбикова, Цыбегмит Раднажапова, Цыцыгма Эрдынеева, Эрдни Канкаев ороно. Гол түлэб тус нэгэдэлэй гэшүүд, мүн мэдээжэ ав­торнуудшье энэ тоодо оролсоно. Хөөрхэн энэ ном хүүгэдэй зурагуудаар гоёор шэмэглээтэй. Томо шриф­тээр үгтэнхэй.

Үдэшые ирагуу найруулагша Со­ёлма Самбуева хүтэлбэрилбэ. Соёл­ма Дашинимаевна Улаан -Үдын 54-дэхи дунда һургуулиин багша, Бүгэдэ буряадуудай «Алтаргана - 2024» наа­данай лауреат, монгол үндэһэтэ арадуудай уласхоорондын фестивалиин эрхим хабаадагша, уран шүлэгүүдээ онлайн хэмжээндэ үргэнөөр табидаг заншалтай эдэбхитэн мүн.

«Байгал» сэдхүүлэй эрхилэг­шэ, Орос Уласай соёлой габьяата хүдэлмэрилэгшэ Г. Х. Базаржапова- Дашеева, Буряадай арадай ирагуу найруулагша, Орос Уласай Уран зо­хёолшодой холбооной гэшүүн Н.Т. Артугаева амаршалгын үгэ хэлэбэ.

Амгалан Будаев эдир зураашан Тамир Очировтай

«Мүнгэн сэргэ», «Улаан Яруу­на», «Дуунай аялга», «Хяагта» гэһэн арадай аман үгын ансамбльнуудай гэшүүд һайндэрэйхеэр, гоёор хубса­ланхай энэ үдэшые шэмэглээ.

Согсолбори соо шүлэгүүдээ оруулһан Должид Даксанова, Соёл­ма Самбуева, Туяна Раднаева, Тала­на Цыбикова, Цыбегмит Раднажа­пова болон бусад олоной һонорто шүлэгүүдээ уншажа, шагнагшадые урмашуулба.

Авторнууд - Соёлма Самбуева, Должид Даксанова

Нэгэдэлэй ажал эдэбхитэй ябуулдаг Дулма Цыренжапова, «Уран Дүшэ» нэгэдэлэй гэшүүн Долгорма Тогмитова халуунаар амаршалаа. “Хальмагай уран зохёолшо, багша Эрдни Канкаевай шүлэгһөө улам­жалан, «Зунай бороон» гэһэн нэрэ үгтөө юм байна. Ехэл философско үндэһэтэй нэрэ, зунай бороонһоо ургамал ногоон, сэсэгүүд һалбаржа, оршон дэлхэй хубилгана ха юм”, - гээд, үгэ хэлэгшэд тэмдэглээ.

Бүхы дээрээ А. А. Будаевай һүүлэй хоёр жэлэй туршада хэжэ байһан хүдэлмэри энэ үдэшэ ёһотойгоор сэгнэгдэбэ. Өөрын һайн дураар, ху­биин үүсхэлээр иимэ ажал ябуулха гээшэ түрүүшынхиеэ мүн гээд, үгэ хэ­лэгшэд һайшаан хэлээ.

Түгэсхэлдэнь Орос Уласай арадай артист, Орос Уласай Уран зохёолшодой холбооной гэшүүн Ч.Ц. Гуруевай үгэ дээрэ бэшэгдэһэн «Эхэ буряад хэ­лэмнай» гэһэн дуун зэдэлжэ, нэрье­жэ, альга ташалган болоо.

Үдэшые эмхидхэһэн Амгалан Бу­даев ном соо ороһон авторнуудта номуудые, мүн номой гадар, дотор шэмэглэһэн эдир залуушуулда кепи түхэлэй зунай малгайнуудые, дурас­хаалта бэлэгүүдые барюулаа. «Ми­нии зүрхэн - хонхохон» гэһэн удаадахи согсолборидо шүлэгүүд суглуулагдаха гээд, соносхогдоһон бай­на.

Энэ хэмжээ ябуулга хадаа нэгэ­дэлэй хүдэлмэриин ээлжээтэ шатые, хүгжэжэ байһыень бүри мүһэн гэр­шэлбэ. Эгээл шухала түсэлдөө гран­това дэмжэлгэ абахын түлөө оролдоо һаа, үрэтэй гэһэн дурадхал ороһон байна.

Галина Базаржаповагай зорюулга

Зулгы һэбшээ татаад,

Зунай бороон ороо,

Зохёол шүлэг хурылаад,

«Зунай бороон» мүндэлөө.

Дуһал бүхэндэнь - баяр,

Мүр бүхэндэнь - сэнгэл,

Дуунай эхин - шагнал,

Мүшэтын замые - сэгнэе!

Зунай бороон соогуур

Зула сэсэг һалбараг,

Хүхюу наадан соогуурнай

Хүсэл зориг эршэдэг!

Доржи-Ханда ТУРТУЕВА