«Алтаргана» нааданда бэлэдхэл түлэг дундаа

Байгша оной июлиин 1-һээ 5 болотор Бүхэдэлхэйн Бүгэдэ буряадуудай наадан Буряад Уласай ниислэл хото Улаан-Үдэ угтан абаха юм. Ехэ хэмжээнэй фестиваль Монголой, Хитадай, Эрхүү можын, Үбэр Байгалай хизаарай болон Оросой Холбоото Уласай бусад можо нютагуудай түлөөлэгшэдые болон зохёохы бүлэгүүдые нэгэдүүлхэ. 2500-һаа дээшэ зүжэгшэд, зохёохы программануудай хабаадагшад эндэ оролсохо гэжэ хүлеэгдэнэ.

Уласхоорондын фестиваль үндэр хэмжээндэ үнгэргэхэ талаар Буряад театр горитой хубитаяа оруулна. Буряадай арадай зүжэгшэн Надежда Мунконова 2025 оной октябрь һараһаа хойшо фестивалиин сценари бэлдэнэ, тэрэ тоодо зүжэглэмэл нааданай либретто бэлдэхэ талаар ажал ябуулна. Буряад обогуудые харуулһан табан хүбүүд тухай үльгэр домогуудта, тиихэдэ арадуудай нэгэдэл, хани барисаа болон түрэл нютагтаа дурлал тухай мүнөө үеын бодолнуудта зүжэг наадан үндэһэлнэ. Зүжэглэмэл нааданай оролто үгын автор Буряадай габьяата зүжэгшэн Чимит Дондоков юм.

Зүжэглэмэл нааданда мори унагшад, уласай ехэ һургуулинуудай, колледжнуудай хатарай бүлэгүүд, Оперо болон баледэй театрай ба П.И. Чайковскиин нэрэмжэтэ соёл урлалай колледжын хоор, дуушад болон зохёохы бүлэгүүд хабаадуулагдахаар түсэблэгдэнхэй. Гэхэтэй хамта зүжэгшэдэй костюмууд болон реквизидүүд бэлдэгдэнэ.

Фестивалиин уран һайханай болон техническэ шэмэглэлгэдэ эмхидхэгшэд ехэтэ анхаралаа хандуулна. Энэ ажал Буряад театрай уран һайханай-зохёохы ажалай талаар захиралай орлогшо Юрий Норбоев хинана. Тиихэдэ Оперо болон баледэй театрай, Ород драмын театрай ба Буряад театрай цехүүд декорацинуудые бүтээнэ. «Алтаргана» нааданай нээлгын баяр ёһололдо хоёр дабхартай онсо тайзан зохёогдоно, гэрэлтүүлгэ, абяа найруулгын талаар ажал ябуулагдана. Июниин 8-һаа тайзанай барилга эхилхэ юм.

Ехэ хэмжээнэй тоглолтодо зохёохы бүлэг бэлэдхэл ябуулна. Эдэ хэд бэ гэжэ тодорхойлбол: тоглолтын найруулгануудай ахамад режиссёр - Буряад театрай уран һайханай талаар хүтэлбэрилэгшэ Олег Юмов; ахамад уран зурааша - Буряадай гүрэнэй Оперо болон баледэй театрай ахамад уран зурааша Алексей Амбаев; ахамад балетмейстер – дуу, хатарай арадай «Раздолье» ансамблиин уран һайханай хүтэлбэрилэгшэ Татьяна Давыдова; сценариин автор – Буряадай арадай зүжэгшэн, Буряад театрай зүжэгшэн Надежда Мунконова; хүгжэмэй талаар даагша – Буряад театрай хүгжэмэй талаар даагша Анастасия Дружинина; режиссёрой туһалагшад – Буряад театрай зүжэгшэд Бато Шойнжонов ба Нацагдорж Жамбалов гэгшэд болоно.

Зүжэглэмэл наадан бэеэ дааһан хэдэн хубинуудһаа бүридэхэ. Энэ талаар ажал режиссёрнууд, хатаршад, хүгжэм найруулагшад эхилэнхэй. Тэдэнэй дунда Юрий Банзаров, Анастасия Дружинина. Зохёохы бүлэгүүд, хабаадагшад бүридхэгдэжэ, уран һайханай ба хүгжэмэй талаар шиидхэбэринүүд элирүүлэгдээ. Зүжэглэмэл найруулгын «Хилэ харууһалһан баатарнууд» ба «Россыпь Алтарганы» гэһэн хубинуудта Буряад драмын театрай зүжэгшэд хабаадаха юм.

Бэлэдхэлэй ажалай шухала шэглэлнүүдэй нэгэн хадаа делегацинуудые бүрилдүүлгэ болоно. Ветеранууд, залуушуул, олон үндэһэ яһатан, олониитын ажаябуулагшад түлөөлэгшэдэй тоодо орохо.

«Алтаргана» нааданай хаалгын баяр ёһололдо мүрысөөнүүдэй, тамирай урилдаануудай илагшадые амаршалха, тиихэдэ һайндэрэй ехэ тоглолто эмхидхэгдэхэ юм.

Хамтын түүхэ, хэлэ, ёһо заншал тойруулан, үе сагуудые, дэбисхэрнүүдые, гүрэнүүдые холбоһон «Алтаргана» наадан буряад юртэмсын эгээл томо хэмжээ ябуулгануудай нэгэн зандаа.

Буряад театрай мэдээсэлэй албан