Агууехэ Илалтын һайндэртэ бэлэдхэл Буряад Уласта эхилээ

Февралиин 19-дэ Буряад Уласай Толгойлогшо Алексей Цыденов Агууехэ Илалтын 80 жэлэй ойдо зорюулагдаһан хэмжээ ябуулгануудай талаар эмхидхэлэй хорооной суглаа үнгэргэбэ. Тиихэдэ 132 хэмжээ ябуулга түсэблэгдэнхэй, тиихэдэ хүшөөнүүд заһабарилагдаха, жэлэй туршада ветерануудта дэмжэлгэ үзүүлэгдэхэ. Майн 9-дэ үнгэргэгдэхэ Илалтын жагсаалда олон сэрэгшэд хабаадаха, тэрэ тоодо Монгол гүрэнэй.

Буряад Уласай Засагай газарай Түрүүлэгшын орлогшо – Буряад Уласай Элүүрые хамгаалгын сайд Евгения Лудуповагай мэдээсэһээр, Илалтын 80 жэлдэ зорюулагдаһан хэмжээ ябуулганууд Россиин Юрэнхылэгшэ Владимир Путинай соносхоһон Эсэгэ ороной хамгаалагшадай жэлэй хэмжээндэ эмхидхэгдэнэ.

«Хэмжээ ябуулганууд ниигэмэй бүхы һалбаринуудые хабаадуулна. Үнгэрэгшэ жэлэй декабрь һараһаа ветерануудые дүнгэжэ байһан һайн дуратанай штабта онсо анхарал хандуулагдана. Һайндэрэй хэмжээ ябуулганууд 4 бүлэгтэ хубаагданхай- соёлой, тамирай, болбосоролой ба дурасхаалта хүшөөнүүдэй, - гэжэ Евгения Лудупова мэдээсэбэ.

Алексей Цыденовэй тэмдэглэһээр, ветерануудай хабаадалгатай хэмжээ ябуулгануудай болзор һэлгүүлжэ огто болохогүй. Мүнөөдэрэй байдалаар, Буряад орондо Агууехэ Эсэгын дайнай 20 хабаадагша, Ленинградай хүреэлэндэ ороһон 5 ажаһуугша, концлагерьта хаагдаһан - 12, ара талада ажаллаһан 1485 хүн тоологдоно.

- Илалтын 80 жэлэй ойн медальнуудые бидэ барюулжа эхилээбди. Энэ хэрэг түргэдхэжэ, апрелиин 1 болотор ветеран бүхэндэ хүрэжэ, шагналнуудые барюулха ёһотойбди. Манай уласта дайнай 20 ветеран үлөө, тэдээндэ онсо анхарал хандуулха хэрэгтэй. Манай голхоролдо ветеранууд һайндэртэ ерэжэ шадахагүй, булта 99-100 наһатай болонхой. Тиимэһээ гэртэнь ошожо амаршалхабди, - гэжэ Буряад Уласай Толгойлогшо тэмдэглээ.

Соёлой һалбарида акцинууд, зүжэгүүд, тоглолтонууд, үзэсхэлэнгүүд, Илалтын жагсаал, үдын буудалга бэлдэгдэнэ. Зарим хэмжээ ябуулганууд январь һараһаа үнгэргэгдэжэ эхилээ. «Агуу Илалта – Великая Победа» гэһэн конкурс-харалган аймагуудта ба хотонуудта байгша оной май, июнь һарануудта үнгэргэгдэхэ. Аймаг бүхэндэ соёлшодой, мэргэжэлтэ артистнуудай, эстрадын ододой, хатарай, дуунай, аман зохёолой коллективуудэй, үхибүүдэй урлалай һургуулинуудай шабинарай хабаадалгатай зүжэглэмэл тоглолтонууд бэлдэгдэхэ. Тиихэдэ сэрэгэй тусхай үйлэ хэрэгүүдые дэмжэлгын акцинууд үнгэргэгдэхэ, гурбан шэглэлээр үзэсхэлэнгүүд дэлгэгдэхэ. Аймагуудай хоорондо илажа гарагшадта шангууд болон мүнгэн бэлэгүүд барюулагдаха.

- Гол хэмжээ ябуулгануудһаа гадна «Агуу Илалта» харалганай хэмжээндэ талаан бэлигтэйшүүлэй конкурснууд үнгэргэгдэхэ. Ехэ тоглолто, хэмжээ ябуулгануудай лауреадуудые шагналга июниин 27-до тамирай ба соёлой «Наадан-Сурхарбаан» һайндэрэй үедэ болохо, - гэжэ Буряад Уласай Соёлой сайд Соелма Дагаева хэлэбэ.

Илалтын һайндэртэ зорюулагдаһан тамирай 31 хэмжээ ябуулга түсэблэгдэнэ. Болбосоролой эмхи зургаануудта заншалта болоһон «Илалтын сонхонууд», «Илалтын дуун», «Сэрэгшын дуунай фестиваль», «Дурасхаалай харуул» гэхэ мэтэ ябуулганууд эмхидхэгдэхэ. Уласай һургуулинуудта Эсэгэ ороноо хамгаалагшадай баатаршалгада зорюулагдаһан дуунууд ба хүгжэмүүд хэшээлэй дохёо болон зэдэлхэ.