Сэбэр сэдьхэлтэй наһатайшуул

Галина Шариповна үндэр наһатай бүлэг ветерануудтай хамта Ивалгын дасанай волонтёрнуудай нэгэдэлдэ оролсоно. Дээдэ Онгостойн дасанай дэргэдэ бүлэг ветеранууд ажалаа ябуулна.

Буддын шажанай дээдэ һургуулиин ректор Дымбрыл багша шагнагшадаа суглуулжа, сэрэгэй тусхай үйлэ хэрэгэй эхинһээ абаад, сэрэгшэдтэ ямар бэ даа туһа үзүүлхэ талаар ажал ябуулһан байна. Тиихэдэ Ивалгын дасанай дэргэдэ, Хойтобэе һууринда, Дээдэ Онгостойн дасанай дэргэдэ волонтёрнуудай таһагууд нээгдээ. Иигэжэ Дээдэ Онгостойдо “Зандан Жуу” гэжэ нэрлэгдэһэн волонтёрнуудай багахан цех нээгдээ бэлэй. Тэндэ хүдэлхэеэ ерэһэн эхэнэрнүүдтэй Галина Шариповна Буянтуева танилсажа, хамсыгаа шуун, ажал хэлсэжэ эхилээ. Түрүүшынгээ алхамууд тухай һонирхолтойгоор хөөрэнэ.

- Иимэ юумэнэй тохёолдоходо, телевизор хараад, уһа нюдэн болошоод бултантай адли гайхажа һуугааб. Бидэ яагаад хайран хүбүүдтээ туһалхабибди, юу хэжэ шадахабибди даа гэжэ һанажа ябааб. “Зандан Жуу” цех ерэхэдээ, шоройеншье хамаад гү, али хүдэлжэ байһан волонтёрнуудта сайшье шанажа уулгуужаб даа гэжэ һанааб. Ороод харан гэхэдэмни, нэгэ хүниинь юушьеб даа хэршэнэ, нүгөө зариманиинь оёно, нүгөөдэнь таһална. Тиигэжэ байтарни, нэгэ эхэнэр оёдолой машина харуулаад, тэндэ һуугаад, юумэ оёод үзыт гэжэ дурадхаа. Иимэ машинка дээрэ оёжо үзөөгүй хүн хадаа хүлэй педаль дарахадаа, сошоод гүйжэ бодошооб. Аргааханаар тэрээндэ дадаһан байнаб, - гэжэ Галина Буянтуева мэдүүлнэ.

Галина Шариповна “Зандан Жуугай” түрүүшын ажалай үдэрнүүдтэ дайралдаһан байна. Буряадтамнай һайн зантай, урагшаа һанаатай хүнүүд олон юм гэжэ эндэ хүдэлхэ үедөө мэдэрээ.

- Бүхы хүн зон өөрын ажалтайшье һаа, иишээ хэдэн часай хугасаада ерээд, оёлсоод ошоно. Нэгэ зариманиинь хахадшье үдэр эндэ сагаа үнгэргэнэ. Өөрынгөө оёдолой машина асаржа үгөөд, оёгты гэһэн хүнүүдшье олон байна. Нэгэ гэр бүлэ гэртэхи гахайнуудаа гаргаад, мяхыень хуураад, хүбүүдтэ эльгээгты гэжэ асаржа үгэнэ. Нюулгын сеть гүрэхэмнай, бүд хэрэгтэй гэхэдэмнай, олон хүн туһа хүргөө. Обоо ехээр элдэбын бүд маанадта асаржа үгөө. Тэдэнь элдэб түхэлэй (торгон, нооһон, сэмбэ, ситец), ондо ондоо үнгэтэй, сэсэгтэйшье бүд байгаа. Иимэ олон һайхан жэшээнүүдые волонтёр болоод байхадаа шэртээб даа, - гээд, Галина Шариповна һанаа алдан хэлэнэ.

Түрүүшээр балаклава, кариматы гэхэ мэтэ сэрэгэй зүйлнүүдые “Зандан Жуу” цехтэ оёжо байгаа. Тиигэжэ байтарнь, далдалан нюулгын сеть хэрэгтэй болоо гэжэ хэлээ. Хоёр жэлһээ үлүү эндэхи ветеранууд сеть гүрэжэ, ехэ дадалтай болоһон байна.

- Харагдаа үзэгдөөгүй юумэ бүтээжэ эхилээбди. Сэхыень хэлээ һаа, түрүүшээр зобообди. Ямар бүдөөр яагаад гүрэхэ юм гэжэ мэдэнгүй байгаабди. Шпагат ооһор оложо, тэрээн дээрэ бүд тааруулаабди. 80 наһа гаталһан Василий Рабсалович Ошоров “би гүльмэ гүрэһэмби, намтай адли гүрэгты” гэжэ эгээл түрүүн харуулжа үгэһэн байна. Сэрэгшэдтэ хандахадамнай, яагаад зүбөөр хэхэб гэжэ заажа үгөө. Энэ хугасаада хуу барандаа шадалтай болообди. Элдэб аргаар гүрэнэбди. “Гирлянды”, “галстуки”, “паучки” гэхэ мэтэ нэрэтэй аргануудаар гүрөөбди. Джи гэһэн маягаар мүнөө ажалнай бүтээгдэнэ. Дээрэһээ доошонь, дороһоонь дээшэнь, ромбик, квадрат гэжэ байгаад бүхы юумэ шудалаад, мүнөө бэрхэнүүд болообди, шууяса ажалаа ябуулнабди. Үбэл болобо гээд сагаан бүд бэдэрхэдэмнай, мүн лэ нөөхи сэрэгшэд маанадай һанаа заһаа. “Эндэ саһан үни удаан байдаггүй, буу шуу хуу тэһэрээд, дэлбэрээд, тэрэ газарынь хара-боро болошодог”, - гэжэ ойлгуулаа. Джи аргаар ехэ һайн гэжэ сэрэгшэд хэлэнэ. Юуб гэхэдэ, шангаар татаатай хушалта дээрэ дайсадай шэдэһэн, хаяһан юумэниинь батут дээрэ унаһан шэнги һөөргөө зайлашадаг байна, - гэжэ Галина Шариповна ажал тухайгаа гүнзэгыгөөр мэдүүлнэ.

Нюулгын хушалтын дель гэжэ нэрэтэй бэлдэгдэһэн ооһорто сеть дээрэ спанбонд гэһэн бүд гүрэгдэнэ. Эдэ бүгэдэ хэрэгсэлнүүд Московско можоһоо асаруулагдана. Энэ хэрэгтэ өөрыншье мүнгэн гаргашалагдана. Иигэжэ цехэй куратор Очирма Кимовна арад зонтой, эмхи зургаануудтай харилсажа, мүнгэ алта суглуулдаг, ажалай түсэб табидаг, тоосоо бариха харюусалгатай ажалтай юм.

Эгээл түрүүн “Зандан Жуу” цехэй ажалшад һарадаа нэгэн-хоёр нюулгын сеть гүрэдэг байһан юм. Шадабари дадалай ехэ болоходо, тэдэ бүри эршэтэйгээр ажалаа ябуулжа эхилээ. Үнгэрһэн сентябрь һарада тэдэ 63 сеть гүрэжэ тушаагаа. Һаяын үдэрнүүдтэ “Витязь” гэһэн нэрэтэй сэрэгшэндэ 8 иимэ сеть дамжуулагдаа.

Очирма Кимовнагай хандахадань, туһалха хүнүүд яһала олоор олдоно. Эгээл түрүүн Этнографическа музейн ажалшад туһалаа. Олон жэлдэ тэндэ хүдэлһэн Галина Шариповнагай хандахада, тэдэ “козёл” гэһэн нюулгын хушалта гүрэхэ станок хэжэ үгөө. Урид ханадаа үлгөөд, нэгэ талаһаань гүрөөд, һүүлдэнь нүгөө талыень хэдэг байгаа. Харин мүнөө абаһаар лэ хоёр талаһаань гүрэнэ.

Улаан-Үдэ хотын захиргаантай харилсаһанай удаа волонтёрнуудта автобус, трамвайгаар ябадаг билет тараагдана. Хотын транспорт ябадаггүй газарнуудта үмсын автобусуудай эзэдтэй харилсажа, баһа миинтээр ябаха арга олгогдоно.

Тус цехтэ олон үндэр наһатайшуул хабаадуулагдана. Эндэ 14 хүнһөө бүридэһэн эдэбхитэд тоологдоно. Тиимэһээ тэдээндэ туһа хэрэгтэй болоно ха юм. Энэ жэлэй эхиндэ Зүүн зүгэй эмшэлгын түбтэ хандалга эльгээгдэһэн байгаа. Иигэжэ волонтёр ветеранууд тиишээ ошожо, хэдэн үдэрэй туршада түлөөһэгүйгөөр аргалуулдаг болонхой.

Элдэб мэргэжэлтэй хүнүүд эндэ ябана. Тэдэнэй тоодо эмшэд, багшанар, бухгалтернууд болоно. Буянтай хэрэгтэ хабаадажа байһан эдэбхитэдые нэрлэхэ дуран хүрэнэ: Татьяна Батуевна Бадмаева, Туяна Дамбиевна Бадмаева, Анжела Петровна Борхонова, Галина Шариповна Буянтуева, Любовь Дармаевна Дамбаева, Сэндэма Васильевна Доржиева, Галина Петровна Занданова, Долгор Цырендондоковна Заятуева, Светлана Лопсоновна Молокшонова, Людмила Гончиковна Ович, Гыма Будажаповна Раднаева, Надежда Терентьевна Толмачева, Надежда Цыремпиловна Тырхеева, Жаргалма Цыден-Дамбаевна Цоктоева гэгшэд болоно.

“Зандан Жуу” цехэй ажалда туһалха дуратайшуул 8-906-936-78-09 гэһэн утаһаар хонходожо, мүнгэн туһаламжа үзүүлхэ аргатайт.

«Зандан Жуу» цехын гэшүүдэй дурадхаһан гэрэл зурагууд.