Буряад Уласта Эсэгэ ороноо хамгаалагшадай жэл эхилбэ

Уласай Засагай газарай, «АКРОСС»компаниин зүгһөө тусхай авто-унаануудай түлхюурнүүд барюулагдаба, сэрэгэй тусхай үйлэ хэрэгүүдэй ветеранууд медальнуудаар шагнагдаба.

Хэмжээ ябуулгын үедэ «АКРОСС» компани эрэмдэг бэетэй ветерануудые энэ машинаар шэрэхэ зорилготойгоор ГАЗ түхэлэй тусхай автомобиль гүрэнэй жасын Буряад Уластахи таһагта барюулаа. Буряад Уласай Засагай газар «ДОСААФ» эмхидэ хүлэй хабаадалгагүй, гараараал жолоододог автомобиль мүн дамжуулба.

Буряад Уласай Толгойлогшо авто-унаануудай түлхюурнүүдые дамжуулха зуураа, эндэ сугларагшадые февралиин 23-да тэмдэглэгдэхэеэ байһан Эсэгэ ороноо хамгаалагшадай һайндэрөөр амаршалаа. Агууехэ Илалтын үдэр болотор 80 үдэр үлэбэ гэжэ Алексей Цыденов мүн тэмдэглээ.

- Мүнөө Эхэ ороноо хамгаалжа ябаһан хүбүүдээ бидэ дэмжэжэ, туһалжа байха ёһотойбди.  «Эсэгэ ороноо хамгаалагшад» гэһэн жаса Россиин Юрэнхылэгшын даабаряар хэдэн жэлэй туршада ажалаа ябуулна, сэрэгэй тусхай үйлэ хэрэгүүдтэ хабаадагшадта, тэдэнэй гэр бүлэнүүдтэ туһална, тэдэниие дэмжэнэ. Мүнөөдэр бидэ ДОСААФ-та гараараа жолоододог авто-унаа дамжуулбабди, энэ машинаар хүбүүд ябажа һураха.  Саашадаа «Эсэгэ ороноо хамгаалагшадай» гэһэг гүрэнэй  жасын Буряад Уластахи таһаг иимэ машинануудые дамжуулжа эхилхэ,- гэжэ Алексей Цыденов хэлэбэ.

«Эсэгэ ороноо хамгаалагшад» гэжэ жасын «Баатарнуудай зал» соо «Сэрэгэй тусхай операцида хабаадаһанай түлөө», «Баяр хүргэгшэ Буряад орон», «Сэрэгшын эсэгэ»,  «Зүрхэ сэдьхэлэй ба уялгын уряагаар» гэһэн медальнуудаар шагналга үнгэргэгдөө, «Эсэгэ ороноо хамгаалагшад» гэжэ үзэсхэлэн дэлгээгдээ. Үзэсхэлэнэй айлшад элдэб үе сагуудта Эсэгэ ороноо хамгаалһан сэрэгшэдэй түүхэтэй танилсаа.  Улаан-Үдын ба Буряадай епархиин Иосиф митрополидай үмсын суглуулбарида хадагалагдажа байһан Агууехэ Эсэгын дайнай үеын бодото экспонадууд олоной һонирхол татаа.

Хэмжээ ябуулгын түгэсхэлдэ һайндэрэй тоглолто болоо, үхибүүдэй гараар бүтээгдэһэн открыткануудые сугларһан зондо бэлэглээ.

Һануулхада, Росси дотор 2025 он Эсэгэ ороной хамгаалагшадай жэл гэжэ соносхогдоо һэн. Энэ хадаа үндэһэтэнэй нэгэдэлэй, Эхэ орондоо дурлалай һүлдэ болохоһоо гадна гүрэнэйнгөө аюулгүйе, бэеэ дааһан байдал хамгаалһан, мүнөөшье хамгаалжа ябаһан сэрэгшэдтэ баяраа мэдүүлгын тэмдэг болоо.