Буряад Уласта дайнай ветерануудта Агуу Илалтада дашарамдуулһан тэдхэмжэ түлэгдэхэ

Федеральна тэдхэмжэдэ нэмэгдэн, уласай мүнгэн һанһаа дайнай болон ажалай ветерануудта мүнгэн туһаламжа үзүүлэгдэхэ гэжэ Буряад Уласай ниигэмэй хамгаалгын яаманай социальна даадхалай хорооной түрүүлэгшэ Оксана Емельяненко тэмдэглэбэ.

- Агууехэ Илалтын 80 жэлэй ойдо дашарамдуулан, дайнай ветерануудта мүнгэн тэдхэмжэ үзүүлжэ эхилэнхэйбди. Ара талын хүдэлмэрилэгшэдтэ туһаламжа хүргэхэ талаар март һарада ажал эхилхэ. Дайнда хабаадагшадта уласай бюджетһээ 100 мянган түхэриг түлэгдэхэ. Мүнөө дээрээ Эсэгэ ороной хамгаалгын Агууехэ дайнай 20 хабаадагшад болон эрэмдэг бэетэйшүүл уластамнай ажаһууна. Ара талын хүдэлмэрилэгшэдтэ 10-10 мянган түхэриг түлэгдэхэ. Ямаршье нэмэлтэ хүнгэлэлтэ үзүүлэгдэдэггүй «Дайнай үеын үхибүүдтэ» 3-3 мянган түхэриг түлэгдэхэ, мүнөө тэдэнэр 3586 хүн ажаһууна, - гэжэ Оксана Емельяненко хэлэбэ.

Эсэгэ ороноо хамгаалгын Агууехэ дайнда хабаадагшадта болон эрэмдэг бэетэйшүүлдэ, Ленинградай хүреэлэнэй ажаһуугшадта болон концлагерьта байһан тэрэ үедэ хуулиин наһа хүсөөгүй багашуулда 100 мянган түхэригэй мүнгэн тэдхэмжэ түлэгдэхэ.

Ара талын хүдэлмэрилэгшэд болон Хойто Солонгосто байлдаанда хабаадаһан ветерануудта 10 мянган түхэригэй туһаламажа үзүүлэгдэхэ.

Тиихэдэ Ородой Холбоото Уласай Юрэнхылэгшэ Владимир Путинай зарлигаар, Эсэгэ ороноо хамгаалгын Агууехэ дайнда хабаадагшадта болон эрэмдэг бэетэйшүүлдэ – 80 мянган түхэриг, ара талын хүдэлмэрилэгшэдтэ 55 мянган түхэригэй тэдхэмжэ федеральна һанһаа түлэгдэхэ юм.