Буряад-монгол зурхай – мартын 3-һаа 9 болотор

Мартын 3, гарагай 2, буряад-монгол литээр 4.

Монлам Ченмо хурал. Гараһан жэлдэ гайгүй, амгалан тайбан ажаһуухаяа хонин жэлтэй хүнүүдэй үргэл мүргэл үйлэдэхэдэ һайн.

4-дэ бэри буулгахада, аралжаа наймаа, худалдаа ябуулхада, модоор уран дарха хэхэдэ һайн. Хэрүүл ама татахагүй.

Амгалан тайбанай, баялигай, малгайн, гуталай, хубсаһанай хэшэг даллага абахада; гахай, хонин, туулай жэлтэй хүнүүдтэ хии мориёо хиидхэхэдэ, һайн үдэр.

«Сэрэгэй» үүдэн нээгдэнэ: сэрэг хүдэлгэхэгүй, заргалдахагүй.

 Энэ үдэр харгыда гарахада, баруун зүг руу муу, бэшэ зүгүүд руу һайн.

 Нохой жэлтэндэ һанаһанаа бүтээхэдэ урагшатай, хонин жэлтэнэй буянай гараг.

Үһэеэ абхуулхада – зүһэ шарай һайжарха.

Мартын 4, гарагай 3, буряад-монгол литээр 5.

Монлам Ченмо хурал. Гараһан жэлдэ гайгүй, амгалан тайбан ажаһуухаяа бишэн жэлтэй хүнүүдэй үргэл мүргэл үйлэдэхэдэ һайн.

5-да ном судар уншахада һайн. Модоор юумэ хэхэгүй, наһа барагшын хэрэг бүтээхэгүй.

Амгалан тайбанай, баялигай хэшэг даллага абахада; хулгана, луу, бишэн жэлтэй хүнүүдтэ хии мориёо хиидхэхэдэ, һайн үдэр.

«Түрэлнүүдэй» үүдэн нээгдэнэ: түрэл гаралнуудтаяа найрлахагүй.

 Энэ үдэр харгыда гарахада, баруун зүг руу муу, бэшэ тээшэ зүглэхэдэ һайн.

 Морин, могой жэлтэнэй урагшатай үдэр; хулгана, гахай жэлтэнэй буян үйлэдэхэ гараг. Тахяа, бишэн жэлтэндэ муу үдэр, һэргэг ябаха хэрэгтэй.

Үһэеэ абхуулхада – баялигта.

Мартын 5, гарагай 4, буряад-монгол литээр 6.

Монлам Ченмо хурал. Гараһан жэлдэ гайгүй, амгалан тайбан ажаһуухаяа тахяа жэлтэй хүнүүдэй үргэл мүргэл үйлэдэхэдэ һайн.

Амгалан жаргалантай Дашаниматай (Үлзытэ) үдэр - абишиг (Ваан) хайрлахада, һайтар байгуулхада (рамнай үргэхэдэ), бурханай тахилга хэхэдэ һайн.

 6-да худалдаа наймаа ябуулхада, хээрэ ажал хэхэдэ болон амидаралай, арьбажуулгын хэрэгүүдтэ һайн. Адуу мал, эд бараа хажуу тээшэ үгэхэгүй. Амгалан тайбанай, мориной хэшэг даллага абахада; бар, морин, нохой жэлтэй хүнүүдтэ хии мориёо хиидхэхэдэ һайн.

 «Хэрэмэй» үүдэн нээгдэнэ: гэрэй һуури татахагүй, гэр байра заһабарилхагүй, зөөлгэхэгүй.

Энэ үдэр харгыда гарахада, зүүн зүг руу муу, бэшэ зүгүүд руу бараг.

Хулгана, гахай жэлтэнэй һайн гараг; үхэр, луу, нохой жэлтэнэй буян үйлэдэхэ үдэр. Морин, могой жэлтэн һэргэг байхые оролдог.

Үһэеэ абхуулхада – зүһэ шарай муудаха.

Мартын 6, гарагай 5, буряад-монгол литээр 7.

Монлам Ченмо хурал. Гараһан жэлдэ гайгүй, амгалан тайбан ажаһуухаяа нохой жэлтэй хүнүүдэй үргэл мүргэл үйлэдэхэдэ һайн.

7-до газар уһанай ажал хэхэдэ, наһа барагшын хэрэг бүтээхэдэ һайн. Бэри буулгахагүй.

Амгалан тайбанай, хүүгэдэй хэшэг даллага абахада; тахяа, үхэр, могой жэлтэй хүнүүдтэ хии мориёо хиидхэхэдэ һайн.

«Бэриин» үүдэн нээгдэнэ: бэри буулгахагүй.

Энэ үдэр харгыда гарахада, зүүн зүг руу муу, бэшэ тээшэ һайн.

Бар, туулай жэлтэнэй урагшатай үдэр, харин тахяа, бишэн жэлтэнэй буян үйлэдэхэдэ һайн. Үхэр, луу, хонин, нохой жэлтэн һэргэг ябахые оролдохо.

Үһэеэ абхуулхада – хэрүүл аманда.

Мартын 7, гарагай 6, буряад-монгол литээр 8.

Монлам Ченмо хурал. Гараһан жэлдэ гайгүй, амгалан тайбан ажаһуухаяа гахай жэлтэй хүнүүдэй үргэл мүргэл үйлэдэхэдэ һайн.

Отошо бурханай дүйсэн үдэр.

8-да дайсадаа номгодхоходо, муу муухайе дарахада һайн. Хээрын ажал болон бэриин хэрэг бүтээхэгүй, хубсаһа эсхэхэгүй.

Амгалан тайбанай, хониной хэшэг даллага абахада һайн.

«Үхээриин» үүдэн нээгдэнэ: хүүр залахагүй.

Энэ үдэр «морин үхэхэ, эмээл хухарха» ушарһаа харгыда гарахада муу, илангаяа зүүн зүг руу.

Хонин, тахяа, бишэн жэлтэнэй урагшатай, һайн үдэр; морин, бишэн жэлтэнэй буянай үдэр. Бар, туулай жэлтэнэй чисаа гараг – һэргэг ябаха хэрэгтэй.

Үһэеэ абхуулхада – наһан ута болохо.

Мартын 8, гарагай 7, буряад-монгол литээр 9.

Монлам Ченмо хурал. Гараһан жэлдэ гайгүй, амгалан тайбан ажаһуухаяа хулгана жэлтэй хүнүүдэй үргэл мүргэл үйлэдэхэдэ һайн.

9-дэ худалдаа наймаа ябуулхада һайн. Бэри буулгахагүй.

Амгалан тайбанай, таряа талханай хэшэг даллага абахада һайн. Бар, морин, нохой жэлтэй хүнүүдтэ хии мориёо хиидхэхэдэ һайн.

«Үхэлэй» үүдэн нээгдэнэ: наһа барагшын хэрэг бүтээхэгүй.

Энэ үдэр харгыда гарахада, урда зүг руу муу, бэшэ тээшэ һайн.

Үхэр жэлтэнэй урагшатай гараг; бар, туулай жэлтэнэй буян үйлэдэхэ үдэр. Хулгана, гахай жэлтэндэ урагшагүй үдэр, һэргэг байха хэрэгтэй. 

Үһэеэ абхуулхада – үбшэндэ.

Мартын 9, гарагай 1, буряад-монгол литээр 10.

Монлам Ченмо хурал. Гараһан жэлдэ гайгүй, амгалан тайбан ажаһуухаяа бар жэлтэй хүнүүдэй үргэл мүргэл үйлэдэхэдэ һайн.

Бадмасамбавын дүйсэн үдэр.

10-да арьбажуулгын хэрэгүүдые бүтээхэдэ һайн.

Энэ үдэр амгалан тайбанай, эдеэ унданай, баялигай, адуу малай хэшэг даллага абахада һайн.

 «Ниитын» үүдэн нээгдэнэ: суглаа зарлахагүй, шухала уулзалга эмхидхэхэгүй.

Энэ үдэр харгыда гарахада, урда зүг руу муу, бэшэ тээшэ зүглэхэдэ һайн. Луу жэлтэнэй урагшатай, һайн гараг.

Үһэеэ абхуулхада – жаргалда.

Жаргал лама ДУГДАНОВ бэлдэбэ