Сагаан һарын найр наадан Буряад Уласта нэербэ

Буряад Уласай ниислэл Улаан-Үдэдэ зүүн зүгэй литээр Шэнэ жэлэй һайндэртэ зорюулагдаһан олониитын суглаан ба тоглолто үнгэргэгдэбэ. Һайндэрэй гол талмай болоһон ФСК-да заншалта соёлой үзэсхэлэн, арадай урлалгын ба гарай бэлэгүүдэй яармаг, буряад арадай ёһо заншалнуудай мастер-классууд, үхибүүдтэ зорюулагдаһан интерактивна нааданууд эмхидхэгдээ.

Ямаршье бэрхэшээлнүүдые бута сохижо, дабан гаража шадахабди гэһэн нэгэдэлэй удха шанартай «Амар мэндэ, Сагаан һара!» («Здравствуй, Белый месяц!») тоглолто олондо һайшаагдаа. Буряад ороной зүжэгшэд үндэһэн буряад ба ород арадай дуунуудай  һонирхолтой коллаборацинуудые харуулаа.

- “Сагаан һарын баяраар таниие халуунаар амаршалнаб! Шэнэ жэлые сарюун хангалаар угтажа, буянтай, жаргалтай ябая! Энэ үдэр манай аха захатаниие хүндэлэн, угайнгаа обоонуудые тахинабди, ёһо заншалаа сахинабди, гэр бүлэнүүдээрээ һайндэрэй шэрээдэ сугларнабди. Россиин Юрэнхылэгшэ энэ жэлые Эсэгэ ороноо хамгаалагшадай жэл гэжэ соносхоо. Мүнөө жэлдэ Агууехэ Илалтын 80 жэлэй ойн баяр тэмдэглэгдэхэ. Бэрхэшээлнүүдые дабан гаража шадахабди, бүхы юумэн урагшатай, һайн байхань болтогой!- гэжэ Буряад Уласай Толгойлогшо харагшадта хандаба.

Уласай Толгойлогшо литературын, урлалай һалбарида амжалта туйлаһанай түлөө  Буряад Уласай гүрэнэй шангуудые, «Найдал» гэжэ шан барюулаа.

- Залуушуул мүнөө буряад хэлэн дээрээ хөөрэлдэхые оролдоно, челлендж болон ролигуудые бүтээнэ, арадайнгаа хубсаһа үмдэнэ. Энэнь һайшаалтай. Буряад-монгол соёлоо эдэбхитэйгээр дэбжүүлэе, уряалнаб!- гэжэ Буряад Уласай Гүрэнэй шанда хүртэгшэ Олег Юмов хэлэбэ.