​Буряад ороноор аяншалга тухай долоон фильм мүрысөөндэ хабаадана

«Алас Дурна - уршагта ябадалнуудай орон» конкурсын 2-дохи хаһада 80 эрхим фильм шэлэгдэһэн байна. Эгээл олон фильм (22) Сахалинай можодо буулгагдаа. Тэрэнһээ гадуур Хабаровскын хизаарта буулгагдаһан -12, Примориин хизаарта буулгагдаһан 11 фильм шорт-листдэ оруулагдаа. Камчаткын хизаарһаа энэ мүрысөөндэ -10, Буряад Уласһаа - 7, Чукоткоһоо долоон фильм оробо. Харин Амурай можоһоо эльгээгдэһэн - 4, Яхадһаа ба Үбэр Байгалай хизаарһаа тус тустаа - 2, Магаданай можоһоо - 1, Еврейн автономно тойрогһоо 1 фильм мүн лэ эрхимүүдэй тоодо ороо.

Зарим фильмнүүд Алас Дурнын хэдэн нютагай дэбисхэр дээрэ буулгагдаа. Жэшээнь, нэгэ аяншалга Хабаровскын ба Амурай можонуудта буулгагдаһан байна. Харин нүгөө хүдэлмэри харабал, Сахалинаар ба Камчаткаар аяншалга тухай хөөрэнэ.

Фильмүүдые конкурсын сайт дээрэ харахаар. 

- Конкурс олоной һонирхол татана. 2-дохи хаһада илагшадые элирүүлхэнь угаа хүндэ байгаа. Олон аяншалагшад Алас Дурнын тойрогто буулгагдаһан аргагүй һонирхолтой хүдэлмэринүүдые эльгээгээ. Илагшадые байгша оной мартын 5-да «Россия» гэжэ үндэһэтэнэй түбтэ соносхохобди. Алас Дурнын тойрогоор аяншалга тухай фильмүүдые хараһан зон тойрогоор аяншалха хүсэлтэй болохо, өөрын буулгабаринуудые конкурсдо эльгээхэ бэзэ гэжэ найданабди. Алас Дурнын гайхамшагта байгаали олоной һонирхол заатагүй татаха ёһотой, - гэжэ Оросой Холбоото Уласай Засагай газарай Түрүүлэгшын орлогшо - Алас Дурнын тойрогоор Россиин Юрэнхылэгшын бүрин эрхэтэ түлөөлэгшэ Юрий Трутнев хэлэбэ.

Конкурсын 2-дохи хаһада эмхидхэлэй хорооной хаягаар дүн хамта 664 фильм эльгээгдээ. 2022 онтой сасуулбал, энэ удаа 3 дахин олон хүдэлмэринүүд бэлдэгдэжэ, шүүгшэдэй һонорто табигдаа. Конкурсдо хабаадагшад гол түлэб Сахалинаар, Хабаровскын ба Примориин хизаарнуудаар аяншалһан байха юм. 2024 оной декабриин 30 болотор хабаадаха тухай захяанууд абтаа.

Байгша оной мартын 5-да үндэһэтэнэй «Россия» түбтэ илагшадые ба шангай һуури эзэлэгшэдые баярай оршон байдалда шагнаха. Хэмжээ ябуулга «ВКонтакте» сүлээндэ 12:00 сагһаа (Москвагай саг) дамжуулагдахаар хараалагдана.

Һануулхада, «Алас Дурна - уршагта ябадалнуудай орон» конкурс 2022 онһоо Оросой Холбоото Уласай Засагай газарай Түрүүлэгшын орлогшо - Алас Дурнын тойрогоор Россиин Юрэнхылэгшын бүрин эрхэтэ түлөөлэгшэ Юрий Трутневай үүсхэлээр эмхидхэгдэнэ. Конкурсдо хабаадахын түлөө Алас Дурнын тойрогоор аяншалга тухай 8 минута хүрэтэр богонихон фильм буулгажа, 2024 оной декабриин 30 болотор путешественникдв.рф сайт руу эльгээхэ эрилтэтэй байгаа. Конкурс гурбан гол янзануудтай байгаа: ябагаар гү, али велосипедээр аяншалга, уһан дээгүүр аяншалга ба үбэлэй сагта аяншалга.