Улаан-Үдэдэ «ИТС регионам» гэһэн хуралдаан үнгэрөө

Мартын 26-да Буряад Уласай ниислэл Россиин нютаг можонуудта унаа тээбэриин оюун ухаанай системэ нэбтэрүүлгын ба хүгжөөлгын асуудалнууд тухай зүбшэн хэлсэхэ талмай болобо. Конференцидэ Россиин 36 нютаг можоһоо 200 гаран хабаадагшад суглараа, тэрэ тоодо Оросой Холбоото Уласай Унаа тээбэриин яаманай, Росавтодорой, Россиин Дотоодын хэрэгүүдэй яаманай, Ростелекомой түлөөлэгшэд, транспортна оюун ухаанай системын ба тоо оньһононой арга зүйнүүдэй тобшолол хэдэг мэргэжэлтэд.

Унаа тээбэриин инфраструктура хүгжөөхэ хуралдаанай шухала үүргэтэй байһые Буряад Уласай Засагай газарай Түрүүлэгшын орлогшо Евгений Луковников тэмдэглэбэ. Мүнөө сагай оюун ухаанай шиидхэбэринүүд экономикын хүгжэлтэдэ, ажабайдалай шанар дээшэлүүлгэдэ, нютаг можонуудые хүрэнгэжүүлгын талаар дура татамаар болгохо хэрэгтэ ехэ үүргэ дүүргэнэ гэжэ тэрэ нэмээ.

- «ИТС регионам» гэжэ хуралдаан аюулгүй ба аша үрэтэй унаа тээбэриин системэ байгуулгада олзын хэрэгэй, эрдэм ухаанай ба гүрэнэй оролдолго, эрмэлзэл нэгэдүүлхэ шухаг арга боломжо үгэнэ, - гэжэ Евгений Луковников онсолоо.

Хоёр үдэрэй туршада үнгэргэгдэхэ конференциин хэмжээндэ хабаадагшад унаа тээбэриин оюун ухаанай системэ нэбтэрүүлхэ асуудал тухай зүбшэн хэлсэхэ, тобшолол хэдэг мэргэжэлтэд түрүү  байгуулгануудые, тэдэниие «Ажамидарал хангаха инфраструктура» гэжэ үндэһэтэнэй түсэлэй шугамаар хэрэглэлгын жэшээнүүд тухай хөөрэхэ.

Буряад Уласай Унаа тээбэри, элшэ хүсэ ба харгын ажахы хүгжѳѳлгын талаар сайд Александр Гоге хуралдаанай Буряад Уласта стратегическэ удха шанартай байһые тэмдэглээ.

 - Улаан-Үдэ ба улас унаа тээбэриин оюун ухаанай системэ хүгжөөхэ ехэ арга боломжотой. 2020 ондо манай нютаг можо түрүү арга зүйнүүдые шалган үзэлгын ба нэбтэрүүлгын пилотно талмай болоо һэн. Энэ дүй дүршэл амжалтатай байжа, манай эрхэтэдэй аюулгүйе сахиха хэрэгтэ шэнэ хараа бодолнуудые олгоо, - гэжэ сайд хэлээ.

«РОСДОРНИИ» гэһэн эмхи зургаанай генеральна захиралай орлогшо Антон Журавлев унаа тээбэриин оюун ухаанай системын аша үрэтэй байхые тэмдэглээ.

 - Унаа тээбэриин оюун ухаанай системэ нэбтэрүүлгын 5 жэл үнгэрөө.  Мүнөө бидэ 2-дохи цикл эхилхэбди. Системэ байгуулжа, ехэнхи ажал дүүргээбди, тэрэнээ аша үрэтэйгөөр хэрэглэхэ бодолго манай урда табигдаа, - гэжэ Антон Журавлев хэлэбэ.

Конференциин хэмжээндэ мартын 26-27-до стратегическа сессинүүд, пленарна зүблөөн ба «Унаа тээбэриин тоо оньһоной ээрэ» гэжэ нютаг можын 1-дэхи мүрысөөн эмхидхэгдээ. Мүрысөөндэ Москвагай, Хабаровскын, Эрхүүгэй, Улаан-Үдын дээдэ һургуулинуудай оюутад хабаадаа. Мүнөөдэр ИТ-чемпионадай хэмжээндэ оюутад унаа тээбэриин һалбарида тоо оньһото шэнэ түхеэрэлгэнүүдые байгуулгын ажал эхилээ. «ИТС регионам» гэжэ үзэсхэлэндэ хабаадагшадай дурадхаһан кейснүүдые тэдэ бодохо.