477
«Хизаар ороноо шэнжэлэлгын үдэрнүүд» гэһэн түсэл үхибүүдые ба эдиршүүлые, мүн ажаһуугшадые уласай аймагуудтай дүтэ танилсуулха зорилготой. Долоон хоног бүри али нэгэн аймагтай танилсуулга болохо. Мартын 31-дэ Түнхэнэй аймагай долоон хоног эхилээ. Болбосоролой бүхы эмхи зургаануудта аймагта зорюулагдаһан хэшээлнүүд үнгэргэгдөө, аймаг тухай материалнууд мэдээсэлэй уудамда хэблэгдээ.
- Эхэ орондоо дуратайгаар һургаха зорилготой « Эхэ орон юунһээ эхитэйб» гэһэн түсэлэй хэмжээндэ багшанартай ба хүмүүжүүлэгшэдтэй, үхибүүдтэй хүдэлдэг мэргэжэлтэдтэй уулзалганууд үнгэргэгдэбэ. Манай багшанартай харилсаанай үедэ хизаар ороноо шэнжэлэлгые хүмүүжүүлгын системэдэ оруулха хэрэгтэй гэжэ ойлгообди. Тэрээнһээ уламжалан, «Хизаар ороноо шэнжэлэлгын үдэрнүүд» гэжэ түсэл байгуулагдаа. Ургажа ябаа залуу үетэниие, уласай бүхы ажаһуугшадые манай аймагуудтай, аймагуудай түүхэтэй, экономикотой, нэрэ суута юумэнүүдтэй, нютагай, уласай, бүхы гүрэнэй хүгжэлтэдэ хубитаяа оруулһан мэдээжэ зонтой танилсуулха зорилго хизаар ороноо шэнжэлэлгын үдэрнүүдэй урда табигдана, - гэжэ Буряад Уласай Толгойлогшын ба Засагай газарай Захиргаанай түрүүлэгшын мэдээсэлэй политикаар, олониитэтэй холбоогоор ба олониитын түсэлнүүдээр орлогшо Ирина Доржиева тэмдэглэбэ.
Нютагай түүхэтэй танилсуулха хэмжээ ябуулгын үедэ ролигууд харуулагдаа, түрүүшүүлэй хүдэлөөн викторинануудые үнгэргэгдөө. Тиихэдэ аймагууд тухай буряад авторнуудай бүтээлнүүд, урид буулгагдаһан фильмнүүд ба дамжуулганууд хэрэглэгдээ, мүн хэшээлнүүд эмхидхэгдээ. Тэрээнһээ гадуур аймаг тухай хөөрэһэн теле-дамжуулганууд олоной һонорто дурадхагдаһан байна, ниигэмэй сүлжээндэ, мэдээсэлэй сайтнуудта аймаг тухай хөөрөөнүүд ба статьянууд толилогдоо.
Хизаар ороноо шэнжэлэлгын долоон хоногой график, бүхы материалнууд «Юунһээ Эхэ орон эхитэйб» гэжэ түсэлэй сайт дээрэ байха. Тус сайт һаяын сагта хүдэлжэ эхилхэ.
Хизаар ороноо шэнжэлэлгын үдэрнүүд « Эхэ орон юунһээ эхитэйб» гэжэ түсэлэй хэмжээндэ бэелүүлэгдэхэ. Энэ түсэл Эхэ орондоо дурлалай үнэтэ зүйлнүүдые ажабайдалай элдэб һалбаринуудта, тодорхойлбол, болбосоролдо, соёлдо, тамирта, аяншалгада, гэр бүлэдэ нэбтэрүүлжэ, Буряад Уласта хүмүүжүүлгын системэ байгуулха зорилготой. Түсэл сэсэрлигэй үхибүүдһээ эмхи зургаануудай ажалшад хүрэтэр эрхэтэдые хабаадуулха.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
